Deputeti i opozitës së re, Halit Valteri ka bërë një thirrje të fortë në Kuvend këtë të enjte, për kolegët, që të mos tallen me sëmundjen e rëndë që shkakton koronavirusi, pasi sipas tij, po humbim jetë shqiptarësh.
Në një replikë me deputetin Ralf Gjoni, Valteri tha se të gjithë politikanët duhet të bëhen bashkë e të mos bëhet politikë me jetën e sëmundjen, e as të desinformohet opinioni publik, me teoritë se Covid nuk ekziston.
“Po dëgjojmë nga kjo foltore, shumë njerëz që po tallen me këtë flamë, ku ne kemi humbur familjarë, të afërm, shokë e miq. E sot e kësaj dite në Sanatorium e spitale vuajnë pacientët. Zonja ministre, ju faleminderit të madhe për gjithçka bëni e gjithë mjekëve, faleminderit që po rrezikoni jetën tuaj.
Nuk ka vend ky parlament për të dezinformuar opinionin publik. Ne duhet të bëhemi bashkë të mos bëjmë politikë me sëmundjen e me jetën. Askush këtu s’ka fytyrë të flasë e të thotë shqiptarëve që kjo sëmundje nuk po na rrezikon, s’ka Covid.
Po humbim jetë shqiptarësh, ju lutem mblidhini mendjen e kokës se shqiptarët sot kanë nevojë për mbështetje, ministria, spitalet, mos hani kot atë që nuk thuhet“, u shpreh Valteri./Bl.Ba/Fjala.al
