Përzgjedhja e 60 oficerëve të policisë gjyqësore si pjesë e Byrosë Kombëtare të hetimit është duke kaluar në një proces të diskutueshëm. Një pjesë e tyre kanë dalë të pakënaqur nga humbja e procesit dhe i janë drejtuar gjykatës së Tiranës për të fituar të drejtën. Por cili është mendimi i ministres së Drejtësisë për këtë padi në gjykatë? Gjatë emisionit HARD TALK NGA ROLAND QAFOKU, Etilda Gjonaj u përgjigj:
-Zonjë, ju thatë që ka dy muaj që ka filluar punë drejtoresha e BKH. Por ka një problem me përzgjedhjen e 60 oficerëve të policisë gjyqësore. Çfarë po ndodh atje?
-Ne ndjekim të gjitha proceset për të kuptuar dhe për të raportuar. Por nga ana tjetër janë procese të cilat janë natyrshëm që mund të ndodhin dhe me ankime. Gjykata do ta vendosë në fund nëse ka një problematikë, por unë di që ndërkohë është një proces që monitorohet edhe nga misionet ndërkombëtar si një kërkesë e ligjit në rradhë të parë, por nga ana tjetër si një vullnet dhe angazhim që partnerët ndërkombëtarë kanë ndërmarrë për gjithë zbatimin e reformës në drejtësi.
-Ju besoni se atje mund të ketë anashkalime dhe një përzgjedhje faire?
-Unë dua të besoj që ligji dhe parashikimet ligjore zbatohen në të gjitha proceset. Ku ka problematika, padyshim zgjidhen me organet kompetente siç është në rastin konkret gjykata.
-Nëse nuk plotësohet numri me 60, ata do shkojnë për specializim në Amerikë?
-Janë partnerët ndërkombëtarë që po e monitorojnë procesin, po ofrojnë këshillim, dhe besoj do kenë përgatitur një program për të gjithë hetuesit të cilët do rekrutohen gjatë kësaj periudhe./Fjala.al/Ke.Ba
