Kryetarja e LSI-së Monika Kryemadhi së bashku me Kryetaren e Lëvizjes Rinore për Integrim, Floida Kërpaçin janë gjobitur me gjobë 3 mijë lekë nga policia e Tiranës pasi ishin duke lëvizur në rrugë pa maskën anti-covid.
Dy figurat e njohura të LSI-së janë pikasur në rrugën ‘Llazi Miho’ në orën 11:00 aty ku janë gjobitur për mosbindje të ligjit, pasi janë kapur duke lëvizur pa maskën mbrojtëse.
Në këto kushte, sipas policisë, në zbatim të Aktit Normativ, të dyja këto shtetase janë ndëshkuar me masën administrative 3000 lekë secila.
“Shërbimet e Komisariatit të Policisë Nr. 6 në Kombinat, në vijim të punës për monitorimin e zbatimit të masave anticovid, kryesisht të vendosjes së maskës së detyrueshme që në momentin që del nga banesa, kanë konstatuar në Kombinat, në rrugën “Llazi Miho”, rreth orës 11:00, shtetaset Monika Kryemadhi dhe Floida Kërpaçi, përfaqësuese të forcës politike LSI, të cilat nuk kishin vendosur maskën mbrojtëse. Në këto kushte, në zbatim të Aktit Normativ, të dyja këto shtetase janë ndëshkuar me masën administrative 3000 lekë secila”, thuhet në njoftimin e policisë.
Kujtojmë se nga data 15 tetor mbajtja e maskës është bërë e detyrueshme si në ambjentet e mbyllura ashtu edhe në publik.
