Kryeministri Edi Rama dha lajmin se sot do të nisë puna për ndërtimin e apartamenteve në Thumanë. Kreu i qeverisë njohu me ecurinë e punimeve Behgjet Pacollin, i cili ka vënë në dispozicion të rindërtimit në këtë zonë 1 mln euro.
Rama deklaroi se pjesa tjetër e rindërtimit do të bëhet me buxhetin e shtetit.
“Lajm i mirë është që sot nisin apartamentet, fillon me fondacionin. Sic e dini Baca Behgjet ka vënë në dispozicion të rindërtimit të Thumanës 1 milionë euro. Më ka thënë që ajo pjesë që unë do të marr do ta ndërtoj. Me buxhetin e shtetit nderojmë pjesën tjetër.
Këtu kemi shkollën që është e kombinuar edhe me kopsht. Në pjesën këtej kemi edhe njësitë administrative. Pra këtu me buxhetin e shtetit do të ndërtojmë njësinë administrative Thumanë, do të vendoset administrata e bashkisë, qendra shëndetësore dhe një qendër komunitare. Ky bëhet një qytet i ri”, u shpreh kryeministri.
Rama tha po ashtu se ka filluar puna edhe me banesat individuale. “Kemi gjithë zonën që do të ndërtohet me vilat. Faza tjetër është tek ajo pllaja e pjerrët. Ka në gjithë zonën hapësira të gjelbra dhe një park qendror. Ndërsa në pjesën këtej do të ndërtohen pallatet”, tha Rama./Bl.Ba/Fjala.al
