Në Rumani, të shtiresh si dikush tjetër në rrjetet sociale përbën vepër penale. Hapja e një llogarie në emër të një tjetri pa pëlqimin e tij është një “krim falsifikimi”, tha Gjykata e Lartë e Kasacionit dhe Drejtësisë, paneli i vendit për zgjidhjen e çështjeve ligjore në çështjet penale.
Kjo vjen pas rasti “Braşov” në dhjetor 2018, kur një burrë kishte kërcënuar ish të dashurën e tij me publikimin e fotove kompromentuese.
Gruas i ishte thënë që nëse ajo nuk do të rikthehej me të, fotografitë e saj nudo do të publikoheshin në internet.
Burri më vonë krijoi një profil në internet me emrin e gruas në një faqe për të rritur, ku ai ngarkoi video seksi të të dyve.
Ai fillimisht u dënua me tre vjet e tetë muaj burg me akuzat e shantazhit, falsifikimit dhe shkeljes së privatësisë, një vendim i mbështetur tani nga gjykata e lartë.
“Në thelb, nëse dikush pretendon të jetë dikush tjetër në një rrjet social dhe mund të provohet se ata e përdorën profilin për qëllimin e krijimit të pasojave ligjore, atëherë ata mund të kenë kryer veprën penale të falsifikimit kompjuterik dhe të sanksionohen në përputhje me rrethanat”, tha Monica Statescu, një avokate rumune e specializuar në sigurinë kibernetike.
Gjykata vuri në dukje dy kritere penale në veçanti; akti i futjes së të dhënave kompjuterike pa pëlqimin e dikujt dhe nëse ai veprim rezulton në të dhëna që nuk korrespondojnë me të vërtetën.
