Personi më i vjetër në Evropë, murgesha franceze Motra Andre, i ka mbijetuar COVID-19 dhe do të festojë 117 vjetorin e lindjes këtë javë.
Lucile Randon, e cila mori emrin Motra Andre kur u bashkua me një urdhër bamirësie katolike në 1944-ën, rezultoi positive ndaj koronavirusit në shtëpinë e saj të pensionit në Toulon, në Francën jugore, më 16 janar. Ajo ishte izoluar nga banorët e tjerë, por nuk shfaqi asnjë simptomë.
E pyetur nëse ishte e frikësuar që të kishte COVID-19, ajo i tha televizionit BFM të Francës: “Jo, nuk u frikësova sepse nuk kisha frikë të vdisja … Jam e lumtur që jam me ju”.
David Tavella, zëdhënës i shtëpisë së pensionit Sainte Catherine Labouré, tha se gjendja e saj tashmë është e mirë
“Ne e konsiderojmë të kuruar. Ajo është shumë e qetë dhe mezi pret të festojë ditëlindjen e saj të 117 të enjten.”
Ai tha se Motra Andre, e cila është e verbër, do të festojë ditëlindjen e saj me një grup më të vogël banorësh se zakonisht për shkak të rrezikut të infektimit nga koronavirusi.
Ajo ka lindur më 11 shkurt 1904 dhe është personi i dytë më i vjetër në botë sipas Listës Botërore të Renditjes Supercentenare të Gerontology Research Group (GRG). Personi më i vjetër është japonezi Kane Tanaka, i cili mbushi 118 vjeç në 2 janar.
