“Auto Moto Park” është projekti më i fundit me fokus promovimin e kulturës së motorsportit, që do të bëhet realitet së shpejti në qytetin e Elbasanit.
Lajmin e ka bërë të ditur kryetari i grupit parlamentar të PS-së, njëkohësisht deputet i qarkut Elbasan, Taulant Balla në rrjetin social Facebook.
Numri dy i PS Balla e ka cilësuar si një hap historik për automotorizimin shqiptar dhe aktivitetet automobilistike.
Investimi përfshin edhe kompleksin e ri të DRSHTRR Elbasan me Qendrën e re të Kontrollit Teknik (kolaudimi), dedikuar shërbimeve të transportit rrugor.
Postimi i plotë i Taulant Ballës:
AUTO MOTO PARK ELBASAN, një ëndërr e shumëpritur, së shpejti realitet. Një hap historik për automotorizimin shqiptar dhe aktivitetet automobilistike, si dhe për promovimin e kulturës së motorsportit
Cirkuiti i parë shqiptar me pistë ~5.3 km dhe një sipërfaqe prej 500,000+ m2 përbri lumit Shkumbin, në zonën e Krastës së Elbasanit, sipas standardeve të FIA, FIM dhe CIK.
Muzeu dhe atelieri RETRO, drag-strip me gjatësi 1.2 km në kushte sigurie, autodrom dhe kartodrom i parë i homologuar, akademi motosporti dhe akademia e edukimit mbi sigurinë rrugore, poligone profesionale testimi, pistë off-road, helipad dhe zonë sportive mjetesh ajrore ultra të lehta.
Investimi përfshin edhe kompleksin e ri të DRSHTRR Elbasan me Qendrën e re të Kontrollit Teknik (kolaudimi), dedikuar shërbimeve të transportit rrugor.
Projekti do të financohet nga fondet e DPSHTRR-MIE në bashkëpunim me Bashkinë e Elbasanit dhe me mbështetjen e Qeverisë sonë.
