Teksa lufta ka hyrë në ditën e gjashtë, raportohet se qendra rajonale e Khersonit në Ukrainën Jugore është e rrethuar nga trupat ruse. Trupat ruse kanë nisur një sulm tokësor në qytetin, që ndodhet pranë Krimesë, i cili kontrollohet tashmë nga Moska, në orët e para të këtij mëngjesi, sipas dëshmive okulare.
“Ushtria ruse po vendos postblloqe në hyrjet e Khersonit”, tha kryebashkiaku Igor Kolykhayev, duke shtuar se “Kherson ka qenë dhe do të mbetet ukrainas”.
“Qyteti është në fakt i rrethuar, ka shumë ushtarë rusë dhe pajisje ushtarake nga të gjitha anët, ata vendosën pika kontrolli në dalje”, tha gazetarja me bazë në Kherson, Alena Panina, gjatë transmetimit në televizionin kombëtar “Ukraina 24”.
Gazetarja shtoi se kishte ende energji elektrike, ujë dhe ngrohje në Kherson, por sipas saj, ishin shfaqur sfida në sjelljen e ushqimit në qytetin me 300 mijë banorë, pasi ushqimi ishte grumbulluar në magazinat në periferi të qytetit.
