Policia rrugore jep alarmin: Vetëm në dy muaj 35 drejtues automjetesh kanë rezultuar të droguar në drejtimin e mjetit.
Këtë fakt e ka bërë të ditur Ali Yzeiri, specialist në Drejtorinë e Përgjithshme të Qarkullimit Rrugor.
Gjatë emisionit Dekalog në RTSH 24, të gazetarit Roland Qafoku, Yzeiri tha se pas atyre që kanë konsumuar alkool, problemi tjetër janë drejtuesit të cilët kanë konsumuar drogëra të lehta dhe të forta gjatë drejtimit të automjetit.
Yzeiri shpjegoi se vetëm në muajt qershor-korrik 2022 nga kontrollet me paisjen e re që është vënë në përdorim, janë kapur 35 përdorues nën efektin e drogës. Ndaj tyre është marrë masa e heqjes së lejes së qarkullimit dhe nisja e hetimeve nga Prokuroria.
Kjo është hera e parë qe Policia publikon zyrtarisht shifër ku drejtuesit e mjetit janë nën efektin e drograve.
