Dy muaj para nisjes së vitit të ri akademik, studentët janë në pritje të rezultateve të raundit të parë të aplikimit për në Universitet.
Ndryshe nga vitet e kalura, dhe ndoshta për herë të parë, interesi për mjekësinë dhe juridikun ka rënë, duke ia lënë vendin e parë degës së inxhinierisë. Vitin e kaluar ishte mjekësia dega për të cilën studentët ishin edhe më të interesuar, nisur edhe nga kërkesa e tregut të punësimit jashtë Shqipërisë, kryesisht në Gjermani.
“Inxhinieria ka kaluar në vend të parë , plus teknologjitë e informacionit dhe ato kanë rreth 25.2% të preferencave në total të maturantëve . Në vend të dytë janë shkencat mjekësore dhe infermieria me rreth 23.8% dhe pastaj në radhë të tretë janë programet ekonomike,shkencat ekonomike ku janë rreth 16%”, tha Arjan Xhelaj, kreu i rrjetit akademik.
Ulja e mesatares për degën e mësuesisë dhe ofrimi i bursës për maturantët që kanë mesatare të mirë dhe zgjedhin një nga degët në rrezik mbyllje, ka rritur lehtë numrin e aplikantëve për të vazhduar studimet pranë Fakultetit të Edukimit dhe degëve të Universitetit Bujqësor.
“Mësuesia është stabël, ka një rritje të lehtë këtë vit për shkak të uljes së mesatares hyrëse së paku pë bachelor. Universiteti bujqësor është pak a shumë në ritmin që ka qenë dhe vitet e kaluara , ka një rritje fare të lehtë në aplikime këtë vit, por ngelet për t’u parë kur fillon procesi i regjistrimit”, tha Xhelaj.
Kujtojmë që vetëm një ditë më parë Ministria e Arsimit njoftoi që viti i ri akademik nis më 17 tetor.
