Në prag të vitit të ri shkollor, kryebashkiaku i Tiranës po inspekton ditë pas dite punimet e fundit në shkollat që pritet të hapen këtë shtator.
Po ashtu, Shkolla e re “Kiço Blushi” që përfshin të gjithë ciklin e sistemit parauniversitar, nga parashkollori deri në gjimnaz, do t’i bashkëngjitet 12 shkollave të reja.
Kreu i Bashkisë, Erion Veliaj, tha se kjo shkollë bashkon zonën e vjetër të Tiranës në Njësinë 8 me lagjen e re të “5 Majit” duke i dhënë fund amullisë dhe ngarkesës që impononte mësimin me dy turne të nxënësve.
“Është një ditë shumë e mirë për të gjithë zonën e Pazarit të Ri, gjithë transformimet që janë aty, por dhe për pjesën e Njësisë 8 që është pjesa e shtuar poshtë Unazës deri tek Bregu i Lumit, sidomos kjo e fundit, e cila ka qenë pjesa ndoshta më e degraduar dhe e lënë pas dore e qytetit”, tha Veliaj.
Sipas tij, fakti që shkolla është realisht pjesa lidhëse, pra e Tiranës së vjetër me Tiranën e re, e këtyre dy realiteteve, të atyre që janë “dem baba dem” me ata që kanë ardhur nga çdo cep i Shqipërisë, jep një zgjidhje të jashtëzakonshme.
Por, shtoi Kryebashkiaku, sidomos me ndërtimin e shkollës së re “Kiço Blushi”, që është padyshim ndoshta një ndër më të mëdhatë në republikë, për faktin që është një shkollë e mesme, shkollë 9-vjeçare dhe parashkollor dhe të gjitha familjet, sidomos nënat e zonës, mund të lënë një fëmijë këtu nga mosha 4 vjeç deri në moshën 18 vjeç.
Veliaj siguroi se me portalin “Mësues për Shqipërinë” edhe stafi mësimor do të jetë i përzgjedhur dhe i kualifikuar në cdo shkollë të re. “Me shkollat e reja krijohet edhe një kolektiv i ri mësuesish, ndër më të mirët e kimisë, fizikës, letërsisë, biologjisë, matematikës, anglishtes e gjermanishtes e kështu me radhë. Kështu që, fakti që kemi infrastrukturën më të mirë dhe mësuesit më të mirë duhet t’i japë besim secilit prind”, përfundoi Veliaj.
