Kryetarja e Kuvendit Lindita Nikolla, dhe delegacioni që e shoqëron, e përmbyllën vizitën zyrtare në Kroaci me takimin me Presidentin e Republikës Zoran Milanoviç.
Nikolla e falënderoi Presidentin Milanoviç për pritjen dhe vuri në dukje se Kroacia është ndër vendet me të cilat Shqipëria ka ndërtuar një partneritet strategjik efektiv dhe bashkëpunim politik të shkëlqyer.
“Ky partneritet mbështetet në vizionin e njëjtë për destinacionin evropian të Ballkanit Perëndimor. Kroacia ka qenë dhe mbetet një mbështetëse e fuqishme e integrimit evropian të Shqipërisë. Shqipëria i është mirënjohëse Kroacisë edhe për mbështetjen e vazhdueshme për Kosovën dhe rritjen e rolit të saj në rajon e në marrëdhëniet ndërkombëtare”, tha Nikolla.
Kryeparlamentarja vlerësoi edhe politikën e jashtme konstruktive të Kroacisë dhe fokusin e saj për marrëdhënie të mira në rajon, kontinent e më gjerë.
Presidenti Milanović shprehu vendosmërinë për vijimin e mbështetjes së anëtarësimit të Shqipërisë në BE. Presidenti konfirmoi gjithashtu mbështetjen e tij për Rezolutën e Kuvendit “Mbi pabazueshmërinë e pretendimeve për trafikimin e paligjshëm të organeve njerëzore në Kosovë dhe Shqipëri.”
Kryetarja Nikolla dhe Presidenti Milanović diskutuan edhe për çështje aktuale të zhvillimeve ekonomike në Shqipëri, Kroaci e rajon si edhe masat që po merren për përballimin e pasojave të shkaktuara nga lufta në Ukrainë.
