Shkrimtarja dhe deputetja e Partisë Demokratike Flutura Açka nuk mbajti dot lotët kur kolegia Grida Duma njoftoi lënien e mandatit të deputetit.
E ftuar këtë të mërkurë në emisionin “Goca dhe Gra”, Açka u pyet se çfarë mendon për vendimin e Dumës që la Kuvendin për të drejtuar emisionin politik “Top Story”.
“Lotët e mi ishin goditje e momentit. Dija diçka, por nuk ma merrte mendja që e kishte marrë vendimin… edhe zëri i dridhur i Gridës dhe të gjitha bashkë, kjo ishte arsyeja e emocionit.
Është vendim personal i saj. Megjithatë, ajo vazhdon të jetë në politik dhe nga ai front”, tha deputetja që më tej komentoi situatën aktuale në PD.
“Kam përshtypjen se mjedisi në PD nuk është akoma aq i shtruar sa të jetë dashamirës. Kjo është një nga arsyet mendoj unë. As unë vetë nuk e gjej veten, nuk jam në ujëra aq të sigurta. Projeksioni im ishte ndryshe”, tha ajo.
