Prishja e pallatit te “Myslim Keta”/ Rama: Ishte ngrehinë e rrezikshme

Kryeministri Edi Rama ka reaguar për pallatin e shembur ditën e djeshme në rrugën ‘Myslym Keta’ në Tiranë. Qëndrimet për prishjen e pallatit ‘Myslym Keta’ Rama i mbajti nga Baldushku, ditën e djeshme aty ku i dha 28 familjeve çelësat për shtëpitë e reja. Rama thotë se asnjë person nuk mund të jetonte në atë ambient, pasi ju rrezikohej jeta, për shkak të gjendjes së tij. Kreu i qeverisë theksoi se çdo familje e atij pallati trajtohet me bonusin e qirasë dhe shtëpia e re do t’iu jepet sapo të jetë gati.“Si mund të jetojnë në pallatin që u shemb këto ditë dhe ca njerëzish janë këta që u dalin në mbrojtje ndërkohë që ai pallat bën mu që është një ngrehinë e rrezikshme, një ngrehinë që me një goditje të matrapikut binte dy kate menjëherë. Atyre të gjithëve ju jepet bonusi i qirasë dhe ju thuhet kur të ndërtohen apartamentet e reja do merrni një tëri. Çfarë duhet të bëjë qeveria dhe bashkia”, tha Rama. Procesi i rindërtimi u mbyll plotësisht me këto familje, ndërsa Rama theksoi edhe njëherë se shtëpitë janë falas dhe do t’iu jepen qytetarëve me tapi.“Është kënaqësi që para një tjetër Viti të Ri në zonën e Baldushkut përmbyllet plotësisht procesi i rindërtimit. Vitin e ri do ta festojnë përfundimisht në shtëpinë e tyre. Provat e prekshme siç janë këto shtëpi që nuk janë projekte, nuk janë fotografi, video, por shtëpi reale, tregojnë atë që ne jemi zotuar që në krye të herës, që të gjithë ata që humbën shtëpitë në tragjedinë e madhe të tërmetit do të rimarrin shtëpi më të forta më të bukura edhe më të mëdha dhe akoma më e rëndësishme do i marrin pa paguar asnjë qindarkë dhe pa i pasur borxh asnjë qindarkë shtetit”, tha Rama. Kryeministri Edi Rama ka përgënjeshtruar lajmin e publikuar nga një media, e cila shkruan se shtëpitë e rindërtuara do merren por qytetarët duhet të paguajnë një kredi të butë.“Lajm i rremë. Kështu thonë kudo ku rindërtohet pas tërmetit, përveçse në Shqipëri ku shtëpitë u janë rindërtuar dhe do t’u rindërtohen FALAS të gjitha familjeve të prekura! Zoti i ruajttë shqiptarët nga epidemia e lajmeve të rreme”, shkruan Rama.