Kryeministri Edi Rama, ka bërë me dije se kanë aplikuar 1000 persona për Programin e ri të Kodimit, teksa bën thirrje për aplikime të mëtejshme për të gjithë ata që duan punë të mirëpaguara në tregun e brendshëm dhe të jashtëm pa lëvizur nga shtëpia.
“Mirëmëngjesi dhe me 1000 aplikantët e parë për Programin e ri të Kodimit, duke i ftuar të gjithë ata që dëshirojnë të aftësohen për punë të mirëpaguara, në tregun e brendshëm apo të jashtëm pa lëvizur nga shtëpia, ju uroj një ditë të mbarë”, shkruan Rama në rrjetin social Facebook.
Programi i Kodimit do t’u japë mundësi të rinjve të talentuar dhe të sapo dalë nga bankat e shkollave, të kenë mundësi për paga më të larta dhe rritje profesionale. Programi mund të gjendet lehtësisht në e-Albania dhe nga 23 janari është i aksesueshëm për të gjithë të interesuarit.
Programi i Kodimit, i njohur ndryshe edhe si Programi i Formimit Profesional, do të zbatohet për herë të parë dhe do t’i shërbejë vizionit afatgjatë që Shqipëria të arrijë potencialin e plotë të digjitalizimit dhe të përgatiten të rinj të aftë të grup-moshës 16-35 vjeç që edhe pa përvojë në shkenca kompjuterike, të kalojnë në një karrierë në industrinë teknologjike, me një kosto relativisht të ulët.
Në këtë proces, Agjencia Kombëtare e Punësimit dhe Aftësimit do të jetë zbatuesja nëpërmjet strukturave të saj në bashkëpunim me institucionet e formimit profesional do të ketë një rol të rëndësishëm. Për ta lehtësuar këtë proces, aplikimi, që do të bëhet në rrugë elektronike përmes portalit qeveritar e-Albania do të qëndrojë i hapur gjatë gjithë vitit.
