Ish-kreu i Shërbimit Informativ Shtetëror, Fatos Klosi deklaroi dje në një intervistë televizive se deklaratat e ish-kryeministrit Sali Berisha në Kuvend për video erotike janë qesharake.
Sipas Klosit, deklarata të tilla të bëra nga një njeri i rëndësishëm si Berisha, i cili ka qenë president dhe kryeministër i vendit e bëjnë situatën edhe më të rëndë. “Është vërtetë e rëndë dhe qesharake që njerëz të rëndësishme si Berisha që ka qenë president dhe kryeministër, dhe kur merret ai me gjëra të tilla që i quan të rëndësishme, imagjino të tjerët. Ata që varen prej tij, janë bërë kopje të tij në të folur, në gjeste.
Nuk besoj se Rama i druhet pasi problemi që është hapur është shfrytëzuar nga opozita, është një problem amerikan pasi një zyrtar i lartë ka shfrytëzuar pozitën edhe pasi ka dalë në pension”, deklaroi Klosi. Kujtojmë se Sali Berisha ka folur shpesh kohët e fundit për ambasadorë të përfshirë në afera rozë dhe që nuk kanë zbatuar si duhet detyrën. Pa përmendur emra, Berisha teksa ishte i ftuar në një studio televizive solli në vëmendje rastin e një diplomati në Tiranë, për të cilin disponohen video intime me persona në “livadhin e qeverisë”.
“Kur diplomati dashurohet në livadhin e qeverisë dhe ato të veshit ja kthen të gjitha në puthje qeverisë dhe shkelma opozitës ky është konflikt i hapur interesi. A do të të them unë ty, që është larguar tjetri, shumë i rëndësishëm, ambasador i filmuar. Të lutem, nuk flas kot, hiqe nga mendja se unë i lejoj vetes të flas kot”, deklaroi Berisha.
