Nga Ylli Pata
Në dekadën e tretë të shekullit të 20, qytetet e mëdha të SHBA, jo vetëm ato të East Coast kishin ngritur në institucion perandorinë e krimit dhe korrupsionit.
Presidenti i SHBA, emëroi një zyrtar të taksave federale, Eliot Ness, të cilit i dha karta biankë që të gjejë provat për të future në burg kryegangsterin e SHBA-së, Al Caponen e Chigagos.
Dihet tashmë saga e tmerrshme dhe e përgjakshme për të futur në burg me prova përfaqësuesin më të rëndësishëm të krimit në SHBA.
Me rënien e “të paprekshmëve”, SHBA arriti të gjejë një rrugë të re, që nuk ishte as rënia e mafia-s së fuqishme, e cila madje u bë më e komplikuar, e as zhdukja e korrupsionit të politikanëve, gjyqtarëve apo prokurorëve.
Por ajo ngjarje preu nyjën gordiane të një situate të frikshme që kishte bllokuar vendin.
Prej asaj kohe, hetimi i korrupsionit dhe mafies është një rrugë e shtruar, herë me kthesa, herë me malore e herë me gunga, por krijoi një sens të ri shtetëror.
Ndaj edhe ambasadori amerikan Donald Lu, përdori fabulën e Al Capones si rrënja e rënies së të paprekshmërisë në politikën shqiptare.
E mbani mend çfarë i kanë bërë Donald Lu-së për mbi 8 vjet me radhë. Për çfarë s’e kanë akuzuar, sharë, anatemuar e tallur. E ja ku jemi sot, Al Caponia shqiptare jo vetëm që është kapur, por edhe më keq se kaq.
Nëse Alfred Capone, burri i vrazhdë me origjinë nga Salerno-ja e rajonit të Campagnas në Itali, vdiq në Miami, i shkatërruar nga sëmundjet dhe mllefet, sequel-a shqiptare e “Të paprekshmëve”, duket se po shkon krejt më keq.
Al Caponet shqiptare, po përjetojnë një situatë edhe më të tmerrshme sesa ajo që bëri gangster i Chicagos, që vdiq pasi u dënua për mashtrim të shtetit amerikan.
SPAK është kthyer në një fuqi e frikshme për politikanët e zyrtarët me cene në vend, e që përveç çuarjes në burg dhe në hetim të një numri shumë të madh, ka nisur një seri hetimesh për pasuritë e “Të paprekshmëve” të Vërtetë. Këto ditë po përjetojmë vetëm pjesë nga pasojat e këtyre hetimeve, ku përveç disa episodeve që vijnë nga SPAK, ka një çorientim total të Al Caponeve, që janë kthyer në karrikatura të vetvetes.
Aq sa ata që kanë themeluar apo ngritur në institucion partitë e pushtetin familjar, sot bërtasin kundër nepotizmit, kundër pjesëmarrjes së familjarëve në poste të rëndësishme.
Por sipas të gjitha gjasave po përjetojmë vetëm fillimin e një odiseje që pritet të jetë një cunami shumë i madh, pasi bëhet fjalë për prona dhe asete të tmerrshme jo vetëm monetare, por edhe asetesh të paluajtshme apo ato të industrisë shqiptare.
Të cilat, siç e provoi Gjykata e Lartë para dy ditësh, sipas të gjitha gjasave do t’i sekuestrojnë një e nga një. E pikërisht ky akt, që nuk ndodhi me Al Caponen në gjyqin e tij të famshëm, po prodhon një efekt më të fuqishëm e shpërthyes të serisë shqiptare të të “Paprekshmëve”.
