Komisioneri Shtetëror i Zgjedhjeve, Ilirjan Celibashi, në një bashkëbisedim me gazetarët është shprehur se pas 31 Marsit do të bëhet shpërndarja e fondeve për partitë politike.
“Do bëjmë shpërndarjen e fondeve pas datës 31 Mars. Është data e fundit që partitë politike do duhet të sjellin raportin financiar për vitin 2022. Shpërndarja e fondeve iu bëhet atyre partive që kanë të drejtë në bazë të ligjit dhe që kanë dorëzuar raportin vjetor”, tha Celibashi.
Kryekomisioneri theksoi se shpërndarja e fondeve nuk ka lidhje me çështjen e drejtimit të Partisë Demokratike. Duke iu përgjigjur pyetjeve të gazetarëve, Celibashi u shpreh se është parashikim i ligjit që në fletën e votimit të shënohet emri i kryetarit të partisë.
Ndër të tjera, Celibashi foli edhe për zbatimin e teknologjisë në votim, numërim elektronik dhe identifikimin biometrik të zgjedhësve. Ai u shpreh se shumë shpejt do të hapen procedurat prokuruese për pajisjet dhe shërbimet respektive.
“Procesi po ecën mirë duke konsideruar kohën që KQZ iu vunë fondet në dispozicion për të përgatitur procesin e votimit elektronik, në Elbasan, Kamëz dhe në Vorë. Këto ditë hapim edhe procedurat prokuruese për pajisjet ose shërbimet teknike respektive. Sa i përket çështjes së operatorëve apo dhe stafit tjetër teknik që do të angazhojë KQZ akoma nuk i kemi hapur thirrjet. Punë ditësh të themi, ndoshta maksimumi, fundi i javës tjetër do i hapim thirrjet për të ftuar të interesuarit për tu angazhuar si operatorë”, tha Celibashi.
