Kryetari i Partisë Demokratike, Sali Berisha, komentoi sot dorëheqjen e Endri Fugës. Gjatë mbledhjes me kandidatët për kryetar Bashkie, kryedemokrati tha se largimi i Fugës lidhet me ngritjen e një sipërmarrjeje në Singapor.
‘Ju e dëgjuat, shqiptarët e dëgjuan. Para 3 ditësh dha dorëheqjen njeriu më i afërt i tij që ai e thërriste ‘parukja’, Fuga. Po pse dha dorëheqjen do thoni ju? Sepse ka ngritur sipërmarrje në Singapor. Po, absolutisht. Të gjithëve iu kujtohet udhëtimi në Singapor i Edi Ramës. Ndokush mendon se u bë për interesa të qytetarëve. Singapori është një vend që mund të mësohet shumë prej tij. U bë për interesa personale, sepse duhet të vendosen në bankat e Singaporit, dhe tani po dërgon Fugën pas parave në Singapor, kanë hapur ndërmarrje atje. E sigurtë! Pra, afera e Durrësit shumë miliardëshe. 420 milionë janë janë djegësat. Të gjitha këto e bëjnë Edi Ramën të ketë frikë çdo sekondë, çdo minutë, ai e përfytyron veten aty ku e ka vendin. Por nuk janë vetëm këto.’- tha Berisha.
Drejtori i Komunikimit të zyrës së kryeministrit, Endri Fuga dha dorëheqjen nga kjo detyrë dy ditë më parë, duke deklaruar se do të fokusohet në fushatën zgjedhore të Partisë Socialiste për zgjedhjet e 14 majit.
