Presidenti i republikës Bajram Begaj dekretoi dje Vlora Hysenin në krye të Shërbimit Informativ Shtetëror. Hyseni më para ka mbajtur postin e drejtueses së shërbimit inteligjent në Kosovë, por u shkarkua në mënyrë të menjëhershme nga kryeministri Albin Kurti dhe presidentja Vjosa Osmani.
Për herë të parë në krye të një institucioni të rëndësishëm do të vendoset një grua. Asnjëherë SHISH nuk ka pasur një femër që ta drejtojë këtë institucion. Presidenti Bajram Begaj dekretoi dje emërimin e Vlora Hyseni si drejtuese të Shërbimit Informativ të Shtetit. Emri i Hysenit u propozua nga Kryeministri Edi Rama, i cili zhvilloi dhe një takim me kreun e shtetit për këtë çështje pak ditë më parë. Rama, pas takimit, deklaroi se Hyseni gëzon eksperiencën e nevojshme dhe respektin në komunitetin ndërkombëtar të inteligjencës. Vlora Hyseni ka një karrierë të gjatë në shërbimet inteligjente të Kosovës. Ajo ka qenë zëvendëskryetare e këtij institucioni, por në një periudhë të shkurtër kohore edhe e ka drejtuar. Hyseni ka qenë dhe këshilltare për sigurinë e Kryeministrit Edi Rama. Propozimi që Rama i bëri presidentit Bajram Begaj për të emëruar në krye të SHISH-it Vlora Hysenin e cila është shkarkuar më herët nga Kurti në Kosovë, ka sjellë reagime të deputetëve të Partisë Demokratike. Ditë më parë, nëpërmjet një reagimi në facebook, deputeti, Gazment Bardhi shkruan se presidenti, Begaj duhet të informohet mbi arsyet e largimit të Hysenit nga posti i shërbimeve të inteligjencës së Kosovës. Ai tha se ky institucion nuk mund të jetë nën kontrollin personal të Ramës. “Edi Rama ka njoftuar se ka propozuar Znj. Vlora Hyseni si drejtore e Shërbimit Informativ Kombëtar. Mediat raportojnë se znj. Hyseni është shkarkuar nga shërbimet e inteligjencës në Republikën e Kosovës, me dyshimet për “zbulim ose mosruajtje të informacioneve të klasifikuara”. Këto raportime janë shqetësuese dhe ngrenë dyshime mbi integritetin e znj. Hyseni. Presidenti i Republikës është i detyruar të marrë informacionet e plota pranë institucioneve të Republikës së Kosovës mbi arsyet e largimit të saj nga të gjitha pozicionet në shërbimet e inteligjencës së Republikës së Kosovës. Për këtë Presidenti i Republikës ka detyrimin të bëjë transparencë për opinionin publik dhe të informoj edhe Kuvendin e Shqipërisë mbi çdo informacion që do të sigurojë. Siguria kombëtare e Shqipërisë është ngushtësisht e lidhur me sigurinë kombëtare të Kosovës. SHIK nuk mund të jetë kurrë institucion nën kontrollin personal të Edi Ramës, me përzgjedhje personale të tij dhe pa asnjë argument që siguron pavarësinë e Shërbimit Informativ Kombëtar dhe ushtrimin prej tij me profesionalizëm e paanësi të misionit të mbrojtjes së sigurisë kombëtare”, shkruan Bardhi. Në një tjetër reagim, deputeti, Kreshnik Çollaku e quajti propozimin e Ramës si një provokim të panevojshëm ndaj institucioneve të Kosovës. “Ky rast më duket nje provokim i panevojshëm nga Shqipëria karshi institucioneve te Kosovës. Është jashtë cdo arsyeje që kjo të ndodhë. Midis institucioneve të dy vendeve tona duhet sa me shume bashkepunim e bashkërendim,ndersa gjeste të tilla stimulojnë konflikt të panevojshëm dhe të dëmshëm”, shkruan Çollaku.