Kreu i PD-së zyrtare, Enkelejd Alibeaj, gjatë prezantimit të pikave kryesore fushatës për zgjedhjet lokale theksoi se forca që përfaqëson është “e djathtë konservatore”, ndërsa akuzoi ish-kryeministrin Sali Berisha si peronin që u fut nën obrellën e Metës.
Qartësisht të dyja palët e dala nga PD janë në fushatë kundër vetes, duke lënë pas kundërshatarin politik Edi Rama.
Në një takim me pjesëmarrje të vogël, kreu i PD-së zyrtare Enkelejd Alibeaj prezantoi kandidatin për kryetar të Bashkisë Tiranë Roland Bejko.
Në qëndrimin e tyre u duk qartë ndarja e madhe me grupimin tjetër të PD-së së përfaqësuar nga Sali Berisha.
Nën moton e slloganit “Frymëmarrje për Shqipërinë” grupimi i PD-së së Alibeajt shpreson në rezultat pozitiv, ndonëse edhe vetë janë të bindur se situate e partisë që drejtojnë është mjaft e rëndë. Politikisht ky grupim po luan me kartën se përfaqësojnë të djathtën konservatore, duke e akuzuar Berishën se është nën obrellën e të majtit Ilir Meta.
“Ata që e quajnë veten të djathtë të votojnë, të mos hutohen nga ata që dikur ishin të djathtë po sot janë strehuar tek e majta.
E kam fjalën për koalicionin në të cilin një pjesë e mirë e demokratëve janë strehuar në ombrellën politike të Ilir Metës. Vota, shkon tek Meta jo te PD. Kështu që, i ftoj demokratët të jenë racional.”- tha kandidati I PD-së zyrtare për bashkinë Tiranë, Roland Bejko.
Ndërsa kryetari Alibeaj shkon më tej kur shprehet se për të kuptuar se kush abuzon me paranë për fushatë mjafton të shohësh shpenzimet e fushatës së Metës, Ramës. Në konferencën për media ku ka prezantuar strategjinë e fushatës për zgjedhjet e 14 majit, Enkelejd Alibeaj ka sulmuar Edi Ramën dhe Sali Berishën për paratë që përdorin. Për Ramën thotë se shpërdorin paratë e buxhetit të shtetit ndërsa për Berishën i kërkon gazetarëve ta pyesin ku i gjen paratë për mitingjet.
“Fushata e Ramës është me shpërdorime masive parash të buxhetit të shtetit. Llogarisni atë që e pretendon si shtesë të pensioneve. I gënjen me nga një karamele vetëm në funksion të zgjedhjeve, po shpenzon para për aktivistin, për rritjen e pagave e del sikur po mbjell pemë. Pyeteni Berishën, ku gjenden paratë.
Në dijeninë time vetëm për të marrë stadiumin duhen 50 mijë euro. Jo vetëm atë por të gjithë sallat e tjera. Pyeteni si e paguan selinë e zaptuar të PD”-tha Alibeaj. Ai u shpreh se demokratët duhet të votojnë PD vetëm në 14 bashkitë që kanë kandidatë ndërsa nuk jep përgjigje konkrete se cila duhet të jetë vota për bashkitë e tjera.
Në konferencën për media i vë theksin faktit që shkojnë në zgjedhje pa koalicion vetëm për të ngritur të djathtën. “Kandidatët e tjerë që janë të së majtës apo të majtës. Janë të PS apo PL, kaq e thjeshtë.
Qëndrimi politik i PD është ky. Votohet vetëm PD në këshilla dhe kandidatë atje ku i kemi. Kjo qëndron në frymën, orientimin, rregullat staturore të PD. Jo, PD nuk ka bërë koalicion. Ne dalim të vetëm sepse duam të tregojmë e testojmë dhe ringremë të djathtën e vlerave, jo ‘non grata-ve’, të djathtën që nuk pret me ankth çfarë do dalë nga SPAK, të djathtën e vlerave euro-atlantike”, tha Alibeaj.
