Ish kryebashkiaku Safet Gjici, i cili u kap filmua duke kryer marrëdhënie seksuale në bashkinë e Kukësit, mësohet se ka ankimuar në Apelin e Posaçëm masën e sigurisë. Aktualisht, Gjici është lënë në burg, ndërsa kërkon të hetohet në liri. Gjici u arrestua më 24 qershor në Tiranë, ndërsa ndodhet në burg nën akuzën për korrupsion pasiv.
GJKKO e la në burg ish-kryebashkiakun më datë 26 qershor, ndërsa ai u shfaq në gjykatë bashkë me 40-vjeçaren Alma K., me të cilë kreu edhe marrëdhënien intime në zyrën e bashkisë. Gjici akuzohet për korrupsion pasi dyshohet se ka favorizuar Alma K., duke i ofruar mbështetje financiare, me vendim të Këshillit Bashkiak, mbi një projekt për strehimin dhe kujdesin ndaj qenve endacakë në qytet.
Vetë 40-vjeçarja ka pranuar para gjykatës se donte nga Gjici tenderin e qenve, ndërsa ish-kryebashkiaku ka thënë se nuk e ka shkelur ligjin. Të dy kanë pretenduar se kishin një lidhje intime me njëri-tjetrin përpara se të flisnin në zyrën e shtetit për tender e favorizime dhe pasi kishin kryer marrëdhënie seksuale. Mbrojtja e Gjicit thotë se nuk ka asnjë vepër penale, pasi nuk ka një tender të shpallur dhe ndonjë procedure të kryer.
