Presidentja e Komisionit Evropian, Ursula von der Leyen u ka bërë thirrje Kosovës dhe Serbisë që të zbatojnë udhërrëfyesin për uljen e tensioneve në Veri.
Në një konferencë për mediet, von der Leyen tha se ekziston një plan nga ndërkombëtarët për shtensionimin e situatës në veri të Kosovës, duke u bërë thirrje të dyja palëve që të de-përshkallëzojnë dhe t’i përmbahen udhërrëfyesit nga BE.
Ajo ka theksuar se kjo marrëveshje është absolutisht jetike për të ecur përpara në mënyrë paqësore.
“Ka një plan të përkushtuar dhe të qartë, një udhërrëfyes… Unë u bëj thirrje të dyja palëve të de-përshkallëzojnë dhe t’i përmbahen udhërrëfyesit. Kjo është absolutisht jetike për të ecur përpara në mënyrë paqësore… Është e qartë se të dyja palët duhet të përmbushin atë që ata janë pajtuar”, tha kreu i KE.
Sot, kryeministri kosovar, Albin Kurti njoftoi për marrëveshjen që Kosova ka arritur me BE për deeskalimin e tensioneve në Veri dhe normalizimin e marrëdhënieve me Serbinë.
“Qeveria jonë ka arritur një marrëveshje me BE-në për hapat e ardhshëm për deeskalimin në veri dhe normalizimin e marrëdhënieve me Serbinë. Kjo tregon gatishmërinë tonë për të ndërmarrë hapa konkretë për të siguruar paqe, siguri dhe stabilitet në Kosovë dhe rajon, në shërbim të demokracisë dhe sundimit të ligjit”, shkroi Kurti në Twitter.
