Gjykata e Lartë rrëzoi dje rekursin e bërë nga partnerja e ish-zëvevëndëskryeministrit Arben Ahmetaj, I shpallur në kërkim ndërkombëtar për akuzën e korrupsionit pasiv, mosdeklarimit të të ardhurave dhe pastrimit të produkteve të veprës penale.
Kërkesat ishin paraqitur nga partnerja Erjola Hoxha dhe shoqja e ish bashkëshortes së Arben Ahmetajt, Elda Dinaj, për heqjen e sekuestrove të vilave në Hamallaj dhe Palasë. Kjo pasi vila në palasë nuk rezultoi të ishte në emër të ish-bashkëshortes së Ahmetajt, Albina Meckës, por të shoqes së saj Elda Dinaj.
Ndërkohë vila e partneres aktuale të Ahmetajt ndodhet në Hamallaj dhe do të vijojë të jetë nën sekuestro. Këto vendime të gjykatave erdhën pasi Ahmetaj akuzohet nga SPAK për tre akuza dhe është shpallur në kërkim ndërkombëtar.
Kujtojmë se vilat në fjalë janë kontrolluar më herët nga Policia, ku janë gjetur sende të vlefshme për hetimin ndaj Ahmetajt, si telefona celularë, laptopë, etj.
Ndonëse me vendimin e djeshëm e mbylli ankimimin për çështjen e “pasurisë së sekuestruar”, Ahmetaj nëpërmjet avokatëve do të kërkojë në gjykatën e Apelit ndryshimin e masës së sigurisë, atë të “arrest me burg pa afat” të dhënë në mungesë nga Gjykata e Shkallës së Parë.
