Armend Mehaj, i cili dha dorëheqjen nga detyra mëngjesin e së martës si ministër i Mbrojtjes në Kosovë, nëpërmjet një postimi në rrjetet sociale ka treguar arsyet pse mori këtë vendim.
Ai nënvizon se ka dhënë dorëheqjen nga kjo detyrë për arsye familjare, për të cilën e kishte njoftuar kryeministrin Kurti kohë më parë.
“Sot, më 08 gusht 2023, në mirëkuptim dhe mirëbesim të plotë, me kërkesën time, Kryeministri Albin Kurti më ka liruar nga detyra e Ministrit të Mbrojtjes të Republikës së Kosovës! Kjo kërkesë prej anës sime, ka ardhur për arsye familjare, për të cilat e kam njoftuar Kryeministrin Kurti, me kohë që më parë. Ai më falënderoi për punën time si dhe për të gjitha angazhimet e përbashkëta deri më sot, gjatë këtyre 29 muajve sa isha në detyrën e Ministrit të Mbrojtjes të Republikës së Kosovës”, është shprehur ai.
Nuk dihet ende nëse Mehaj do të transferohet në ndonjë pozitë në institucionet e Kosovës, apo do të kthehet në vendin ku ka jetuar e punuar më herët, në Norvegji.
Në pozicionin e ministrit të Mbrojtjes, kryeministri Albin Kurti ka vendosur kolonelin e Forcës së Sigurisë së Kosovës, Ejup Maqedonci.
