Kryeministri i Kosovës Albin Kurti ka folur lidhur me marrëdhëniet Shqipëri-Kosovë.
Në një intervistë për gazetën greke “To Vima”, Kurti është pyetur nëse e përkrah bashkimin e Kosovës me Shqipërinë. Ai u përgjigj duke thënë se Kosova dhe Shqipëria janë një komb dhe dy shtete teksa shtoi se marrëdhëniet me Shqipërinë janë të shkëlqyera.
Kurti tha gjithashtu se akuzat ndaj tij në lidhje me bashkimin e dy shteteve vinin nga serbët për shkak se ata duan që Bosnja të bashkohet me Serbinë, raportojnë mediat greke.
“Shqiptarët në Kosovë përbëjnë 93%. Ne jemi një komb, por dy shtete. Kam fituar pushtetin në shkurt të 2021-shit duke premtuar punë dhe drejtësi dhe këto mbeten prioriteti im. Ne kemi marrëdhënie të shkëlqyera me Shqipërinë. Mendoj se shumica e akuzave ndaj meje, në lidhje me bashkimin, vijnë nga serbët, sepse ata duan që Republika Srpska (Bosnja) të bashkohet me Serbinë. Ata kanë shpikur të ashtuquajturën ‘Bota Serbe’ si një eufemizëm për Serbinë e Madhe”, tha Kurti.
Kryeministri i Kosovës është pyetur edhe nëse ai dëshiron bashkim me Shqipërinë, por Kurti u shpreh se për momentin Kushtetuta e Kosovës nuk e lejon një gjë të tillë dhe se Qeveria e Kosovës është e fokusuar në mbrojtjen e vendit, integritetit territorial dhe sovranitetit.
“Për momentin Kushtetuta e Kosovës nuk e lejon këtë dhe ne jemi të fokusuar në mbrojtjen e vendit tonë, integritetit territorial dhe sovranitetit të tij. Por e përsëris se ne kemi marrëdhënie të shkëlqyera me Shqipërinë dhe megjithëse jemi një komb, jemi dy shtete të ndryshme”, përfundoi Albin Kurti./ S.M
