Para nisjes së seancës parlamentare, Lulzim Basha ka deklaruar se demokratët tashmë duhet të tejkalojnë interesat personale.
Duke folur për gazetarët nga oborri i Parlamentit, nisur nga zhvillimet brenda kampit të demokratëve, Basha tha se deputetët e PD nuk duhet të merren me njëri-tjetrin, por t’u shërbejnë qytetarëve.
“Një gjë është e sigurt, PD nuk do lëvizë nga kursi i saj properëndimor. Asnjë debat artificial dhe i natyrshëm me njëri-tjetrin nuk ndihmon me kauzën tonë. Ne nuk jemi në këtë sallë të merremi me njëri-tjetrin. Duhet t’u shërbejmë njerëzve.
Me hyrjen në fuqi të statutit të PD, janë marrë vendimet përkatëse. Për të shuar kureshtjen tuaj dhe të qytetarëve, dua ta deklaroj që si kryetar i PD ngarkuar nga Statuti edhe me detyrën e kryetarit të grupit parlamentar, kam ndërmend ta delegoj këtë detyrë tek një nga nënkryetarët e zgjedhur.
Pas një kohe shumë të vështirë, thirrja për çdo deputet është që tani është momenti të shikojmë përtej interesave personale, në fund të fundit janë shprehur mbi 4000 delegatë të PD dhe ata janë një fuqi reale në mbështetje të çdo veprimi të PD. Kjo është mbështetja në të cilën mund të mbështeten të gjithë deputetë e PD, të gjithë pa përjashtim”, tha ndër të tjera Lulzim Basha. / S.M
