Kuvendi njeh ende kryetar të Grupit Parlamentar të PD-së Gazmend Bardhin, ndonëse ky i fundit u shkarkua nga Basha dhe në vendin e tij emëroi Flutura Açkën. E emërua e Bashës ikën nga mbledhja në mënyrë demonstrative: “U largova për të mos e bërë qesharake këtë situatë”.
Në një email zyrtar të Kuvendit janë thirrur dje në mbledhje kryetarët e Grupeve Parlamentare ku ajo që bien ë sy është se Gazmend Bardhi njihet si kreu i Grupit Parlamentar të PD-së, pavarësisht se Lulzim Basha si kryetar i PD-së zyrtare e kishte shkarkuar dhe në vendin e tij emëroi Flutura Açkën. Mbledhja e Konferencës së Kryetarëve u zhvillua dje. Në njoftimin e Kuvendit thuhet se” Në mbledhje do të diskutohet: Shqyrtimi i draftkalendarit të punimeve të Kuvendit për periudhën 25 shtator – 13 tetor 2023. – Shqyrtimi i kërkesës së bashkëkryetarëve të Komisionit të Posaçëm Parlamentarë për Reformën Zgjedhore, për shtyrjen e afatit të veprimtarisë së këtij komisioni; Raportimi periodik mbi ecurinë e zbatimit të Planit të Veprimit të Kuvendit për Zbatimin e Rekomandimeve të Raportit të KE-së për Shqipërinë për vitin 2022, periudha 1 Janar”. Por ajo që bien ë sy është se ky email zyrtar i ka mbërritur Gamend Bardhit si kreu i grupit Parlamentar të PD-së. Si për ironi edhe Flutura Açka do ishte pjesë e mbledhjes, por si drejtuese e Komisionit Parlamentar të Medias.
Ajo që ndodhi më pas në takim ishte largimi demonstrative i Açkës e cila pati edhe një reagim në rrjetet sociale. Në reagimin e saj, Flutura Açka tregon arsyet pse u largua nga mbledhja e Konferencës së Kryetarëve. “Kuvendi NUK u shpreh dhe shpresoj të shprehet shpejt, sepse, siç edhe thashë në Konferencën e Kryetarëve – nga e cila u largova të mos e bëj qesharake situtës mes kolegëve të mi, me të cilët më shumë gjëra më bashkojnë se më ndajnë – “dy dado e vrasin fëmijën!” Partia Demokratike nuk ndihmohet me kaos, por me distancë higjienike nga interesi personal i çdonjërit prej nesh, me përgjegjësinë politike të deleguar nga shqiptarët”-shkruan Açka. Deputeti i Partisë Demokratike Gazment Bardhi ka folur për mediat pas përfundimit të mbledhjes së Koonferencës së Kryetarëve. Bardhi u shpreh se gjatë takimit u diskutua komisioni i reformës zgjedhore, teksa shtoi se opozita ka marrë përgjegjësitë e veta për mosrealizimin e reformës zgjedhore. Ai u shpreh se mazhoranca nuk e ka prioritet reformën zgjedhore, ndërsa u shpreh më tej se opzoita nuk e pranon që çështja e zgjedhjeve të lira të mos trajtohet. “Komisioni i reformës zgjedhore u diskutua sot gjatë mbledhjes. I jam drejtuar kryetares së kuvendit për të nxjerrë përgjegjësitë për komisionin që është mbledhur 2 herë në 1 vit pa dhënë asnjë rezultat. Në zgjedhjet e 14 majit duhet të shkonim me një kuadër të plotë ligjor që përmbushte rekomandimet e OSBE. I kam kujtuar kolegëve të PS që kanë shpallur si prioritet reformën zgjedhore, për të cilën duhet të jesh serioz. Si opozitë kemi marrë përgjegjësitë tona për mosrealizimin e reformës zgjedhore. Nuk pranojmë dot që një çështje si zgjedhjet e lira të mos trajtohet. Këtë e kemi adresuar duke krijuar një ekip të ri përfaqësimi në komisionin e reformës zgjedhore”, u shpreh ai.
A do të ndryshojë qëndrim Kuvendi?
Në seancën e mëparshme Parlamentare pati debate të forta mes kryeparlamentares Lindita Nikolla dhe deputetit të PD-së Gazmend Bardhi, pikërisht për një shkresë të dërguar nga Basha drejtuar kryeparlamentares ku shkarkonte Bardhin dhe në vendin e tij emëronte Açkën. Ndonëse nuk pati qëndrim zyrtar nga Kuvendi mësohet se do kjo çështje do të diskutohet në vijim se kush do të njihet nën drejtimin e Grupit Parlamentar të PD-së. Kreu i PD-së zyrtare pretendon se ka të drejtën të shkarkojë Bardhin dhe të emërojë një mbështetës të tij. Aktualisht Basha ka vetëm tetë deputetët të cilët e përkrahin ndërsa pjesa tjetër i është bashkuar “Grupimit Berisha”, përfshi edhe Gazmend Bardhin. Një provë se Kuvendi ende njeh Bardhin kryetar grupi ishte dita e djeshme, por nuk dihet nëse kjo situatë do të vijojë edhe në seancat e ardhshme dhe do të rrëzohet propozimi i Bashës.
