Mijëra klientë të Apple janë ankuar se modeli i fundit i iPhone 15 po mbinxehet, vetëm disa ditë pas lançimit të tij.
Blerësit e iPhone 15 Pro dhe Pro Max të ri kanë raportuar në forumet në internet, duke përfshirë faqet e mbështetjes së klientit të Apple, Reddit dhe platformat e tjera të mediave sociale, se pajisjet e tyre janë aq të nxehta sa nuk mund t’i prekin.
Më shumë se 2,000 përdorues në forumet e Apple kanë raportuar se kanë përjetuar problemin e mbinxehjes.
Të tjerë, megjithatë, mohuan se kishte një problem të tillë, të cilin ekspertët ia atribuan kabllove të lira të karikimit dhe përdorimit të tepërt të aplikacioneve video ose lojërash.
Apple nuk pranoi të komentojë mbi raportet. Faqet e tij të mbështetjes së klientit tregojnë se iPhone “mund të ngrohen” kur konfigurohen për herë të parë, duke përdorur karikim me valë ose duke luajtur “aplikacione intensive”.
iPhone 15 Pro është smartfoni i parë i ndërtuar mbi teknologjinë e re të çipit 3nm nga Taiwan Semiconductor Manufacturing Company, prodhuesi i çipave që furnizon Apple si dhe Nvidia dhe shumë kompani të tjera të Silicon Valley.
Ndryshimi më i rëndësishëm, megjithatë, është ndërprerja e lidhësit Lightning të Apple dhe futja e karikimit USB-C, pasi Apple është detyruar të respektojë rregulloren e re të BE-së, sipas së cilës të gjitha pajisjet elektronike portative duhet të përdorin të njëjtin karikues me lidhësi specifik që do të jetë i zakonshëm për iPhone, iPad dhe kompjuterë Mac./e.t
