Turi i takimeve/ Basha nga Tirana: Qytetarët i kanë mirëpritur propozimet e mia

Turin e takimeve që ka nisur në të gjithë Shqipërinë, Lulzim Basha e ndali në Tiranë.

I pashqetësuar nga lufta e brendshme, qoftë me demokratët e Foltores, e qoftë në parlament me deputetët e Gazment Bardhit, kreu i PD thotë se Partia Demokratike do të çojë para nismat, të cilat tashmë po ia prezanton dhe drejtpërdrejtë qytetarëve.

“Shumë qytetarë më kanë thënë se i kanë mirëpritur propozimet e mia që vetting-u në politikë të faktojë kush janë politikanët e korruptuar.

Ata duan që ta zgjedhin vetë deputetin e tyre dhe shqiptarët që jetojnë jashtë vendit të kenë mundësi të votojnë në zgjedhje nga aty ku jetojnë e po kështu që Presidentin ta zgjedhë drejtpërdrejt populli.”- tha Basha.

Basha thotë se deputetëve dhe qeveritarët duhet të mos kenë asnjë mburojë imuniteti për t’u hetuar nga SPAK.

“Paratë që duhet të shkonin te qytetarët, sot përfundojnë në xhepat e një grushti oligarkësh të lidhur me qeveritarë të korruptuar.

Për këtë ne kemi kërkuar që deputetët dhe qeveritarët të mos kenë asnjë imunitet për t’u hetuar nga SPAK.”- u shpreh Basha.

Kreu i PD ka nisur takimet me qytetarët në të gjithë qytetet e vendit.

Ky tur, që shihet si një fushatë e parakohshme, pritet të zgjasë rreth dy muaj, kohë kur PD do të përfundojë të gjithë procesin e reformimit të brendshëm, reformim që ka lënë jashtë strukturave të PD zyrtare berishistët./   S.M