Ish-presidenti i Kosovës, Behgjet Pacolli, ka reaguar pas arrestimit të ish-këshilltarit të tij, Naim Murseli.
Pacolli thotë se është i shokuar nga kjo ngjarje, ndërsa inkurajon drejtësinë që të dënojë maksimalisht personat përgjegjës.
Ai e cilëson vrasjen e bashkëshortes së ish-këshilltarit të tij si një akt të tmerrshëm dhe makabër, që nuk është parë në traditën e shqiptarëve
“Sot, fëmijët dhe familja kanë varrosur Liridonën, një vajzë dhe nënë të re e cila u vra mizorisht. Jam ende i tmerruar dhe i tronditur nga vrasja e Liridonës, të cilën e kam njohur personalisht. Sot dhe çdo ditë, lutjet dhe mendimet e mia janë me fëmijët dhe familjen e Liridonës.
E përgëzoj policinë e Kosovës për punën e madhe dhe profesionale që po bëjnë për zbulimin e rastit. Kushdo qoftë mbrapa këtij akti të tmerrshëm dhe makabër (akt i pa parë ne traditën tonë), duhet të dalë para drejtësisë dhe të merr dënimin maksimal për këtë.
Sot, dy fëmijë janë pa nënën e tyre, të cilës jeta u mor në rininë e saj.
E pabesueshme dhe e trishtueshme.
Jam ende i shokuar!”, shkruan ish-presidenti i Kosovës.
Ndërkohë, kujtojmë se ish-këshilltari i tij, Naim Murseli u arrestua nga policia së bashku me autorin Granit Plava.
Ky i fundit delaroi para hetuesve se për të kryer vrasjen është paguar me 30 mijë euro nga bashkëshorti i viktimës./E.T
