VIDEO- “Donin të transmetonim LIVE gjithçka”/ Terror në stacionin televiziv

Një episod i tmerrshëm ka ndodhur në Ekuador, ku persona me kapuç dhe të armatosur hynë në studion e televizionit shtetëror Tc Television gjatë një transmetimi të drejtpërdrejtë duke mbajtur peng njerëzit që ndodheshin në studio, ndërsa pamjet janë bërë virale në rrjetet sociale.

Transmetimi nuk u ndërpre dhe u dëgjuan të shtëna, ndërsa episodi i dhunës u transmetua edhe në shtëpitë e qytetarëve.

Policia thotë se më vonë liroi të gjithë stafin dhe bëri 13 arrestime. Stacioni tha se dy punonjës u plagosën.

“Një kameraman u qëllua në këmbë dhe një tjetri iu thye krahu në sulm”, tha zëvendësdrejtori i lajmeve.

Gjatë sulmit, një person i armatosur drejtoi një armë gjahu në kokën e njërit prej personave të marrë peng në studio.

Një grua mund të dëgjohej duke u lutur, “Mos qëlloni, ju lutem mos qëlloni”, raporton agjencia e lajmeve AFP.

“Ju lutemi, ata hynë për të na vrarë,” i tha një punonjës AFP. “Zoti mos lejo që kjo të ndodhë. Kriminelët janë në transmetim.”

“Nga kufjet më erdhi një zë që thoshte: Kini kujdes, ata po përpiqen të hyjnë, po vjedhin, po na grabitin”, tha Jorge Rendon për agjencinë e lajmeve Reuters.

“Dyert në studio janë shumë të trasha, pothuajse të papërshkueshme nga plumbat, dhe ata po përpiqeshin të hynin sepse donin të kishin akses në studio, kështu që ne do të transmetonim live gjithçka që ato do të na urdhëronin”, tha ai.

Të paktën 10 persona janë vrarë që nga fillimi i gjendjes së jashtëzakonshme 60-ditore në Ekuador të hënën.

Sulme me bomba, dhunë ndaj popullatës dhe policisë, plaçkitje, të shtëna, grabitje, zjarrvënie. Ekuadori është përfshirë në një “konflikt të armatosur të brendshëm”, siç e ka quajtur presidenti Daniel Noboa, i cili në një ditë të vetme ka shkaktuar tetë vdekje vetëm në Guayaquil.

Qyteti i dytë i vendit është epiqendra e valës së dhunës që ka mbërthyer prej kohësh Ekuadorin dhe që shpërtheu pas arratisjes nga burgu të dy trafikantëve të shquar të drogës dhe vendimit të Noboas për të dekretuar gjendjen e jashtëzakonshme.

Gjithashtu në Guayaquil, një stacion policie u godit nga një sulm, ndërsa dy punonjës të sigurisë në një qendër tregtare u vranë nga kriminelët.

Në total janë arrestuar 14 persona dhe do të akuzohen për terrorizëm. Dhuna ka ndodhur në disa qytete të tjera, duke përfshirë kryeqytetin Quito.

Serioziteti i situatës vihet në pah nga zgjedhja e Ministrisë së Shëndetësisë për të pezulluar të gjitha shërbimet ambulatore, shtrimet dhe ndërhyrjet e planifikuara kirurgjikale deri në njoftimin e dytë, duke garantuar vetëm shërbimet e urgjencës në spitale./O.S