Në Durrës kërkojnë ndihmë deri në 400 persona në ditë, në Lushnje ka edhe të shtruar
Një numër i lartë personash paraqiten në urgjencën e spitalit të Durrësit me simptoma të virozave të stinës. Mjekët thonë se paraqiten deri në 400 raste në ditë ndërsa fatmirësisht jo në gjendje tepër të rëndë. Sipas tyre nuk mungojnë as rastet me Covid
“Vijnë rreth 300-400 raste në ditë. Ata paraqiten pothuajse më simptoma të njejta. Shumica rreth 90% e rasteve janë me temperaturë, kollë, hundë, diare, dobësi të përgjithshme. Pothuajse këto janë simptomat më të shpeshta që has tek këto pacientë.”
Problematike paraqitet situata edhe në spitalin e Lushnjës. Edhe aty shumë persona kërkojnë ndihmë mjekësore. Disa prej personave qëndrojnë të shtruar në këtë spital ndërsa sipas bluzave të bardha gripi shkakton kryesisht temperaturë të lartë, por edhe probleme në rrugët e frymëmarrjes.
“Kryesisht qarkullon virusi i gripit dhe virozave të rrugëve të sipërme respiratore. Janë më pak rastet të cilat janë konfirmuar më Covid në krahasim me vitet e tjera.”
Me simptoma të virozave paraqiten edhe grupmoshat e vogla ndërsa këshillohen prindërit që mos t’i dërgojnë në shkollë apo çerdhe kur kanë probleme shëndetësore për të parandaluar përhapjen e virusit./O.S
