“Me kë jam Unë?”

Më pyesin shpesh:

me kë je Ti Yll? Më pyesin çdo ditë dashamirës e dashakeqës.

Më pyeti dje dhe një ish Ministër

i zbardhur nga thinjat:

Me kë të jesh o Yll?

Dhe unë, dua sot ti përgjigjem çdo kujt që në rehatinë e Tij, në kuletën e Tij, në Partinë e Tij, e ka këtë kërshëri, e ka këtë kuriozitet, që shpesh na “zë mat” në përgjigje:

Unë sot jam me zjarrin!

Ose,

Unë jam ti fryj prushit që të rindizet zjarri!

Unë nuk jam me mykun!

Unë jam që ngjarjet të zhvillohen në rrjedhë e jo në ujra të ndenjura, në këneta, në moçale në kuvende me anonimë.

Unë jam që ngjarjet të mos zhvillohen më në banaqet e TV, në kafenetë apo në rrugica.

Unë jam që ngjarjet të shpërthejnë, të vërshojnë në rrugë e bulevarde.

Unë denoncoj çdo ditë nën ironinë time.

Por Ju kërkoni emër? Kërkoni kush është Ai që jam Unë?

Dhe prap po Ju përgjigjem:

Unë jam me Njërin nga Ju që do të marrë përsipër ta drejtojë këtë pakënaqësi, këtë urrejtje, këtë revoltë popullore drejt një fitore.

Por, Ai sot është anonim. Është anonim se jeni dhe Ju anonim.

Nuk jeni zgjuar Ju që të dalë Ai që jam Unë, që je Ti, që jemi Ne. Ndaj Unë dhe të tjerë dashamirës si Unë po ju nxisim Ju, që ta pjellim Atë…që vazhdon të tundet në epruveten e vegjëlisë.