Koordinatorja e projekteve, Ersa Prifti, ka folur në një intervistë për letrën e 56 organizatave drejtuar kryeministrit dhe institucioneve kryesore në vend me anë të së cilit kërkojnë tërheqjen e projektligjin për zonat e mbrojtura, pasi e konsiderojnë si rrezik për shkatërrimin e natyrës, thotë se nuk janë vetëm organizata në fushën e mjedisit.
Prifti bëri të ditur se firmëtare janë edhe organizata të fushave të tjera sociale, organizata të shoqërisë civile që janë bërë bashkë dhe kërkojnë tërheqjen e këtij projektligji nga seancat plenare dhe për të ndjekur procedurën e rregullt të konsultimit publik.
“Duhet dëgjesë dhe me aktorët e interesit. Duhet që publiku të mbetet i informuar dhe të jetë pjesë e vendimmarrjes.
Ndryshimet e reja cenojnë funksionin primar të zonave të mbrojtura, cenojnë mbrojtjen e tyre.
I lihet vend korrupsionit dhe ndërtimeve që janë zhvilluar shumë vitet e fundit në Shqipëri.
Në ligj shprehet se mund të ndërtohet për të zhvilluar zonat. Por nuk mund të ndërtosh, të prekësh dhe cenosh zonat e mbrojtura që janë me ligj.
Me dërgesat e kërkesave në rrugë zyrtare në Kuvendin e Shqipërisë dhe Këshillin e Ministrave, janë informuar dhe ambasadorë dhe organizatat ndërkombëtare për t’u bërë një zë më shumë ndaj ndryshimit në ligjin për zonat e mbrojtura.
Kemi mbështetje dhe nga organizatat ndërkombëtare dhe ambasadorë në Shqipëri të cilët kanë shprehur shqetësimet e tyre për ndryshimet që mund të bëhen. Kemi një reagim të fuqishëm deri më tani.”, përfundoi Prifti./e.t
