Një shqiptar harxhon mesatarisht gjatë vitit 2022 rreth 385 euro për konsumin e mishit. Të dhënat tregojnë se shpenzimet në vendin tonë për këtë produkt u rritën 17% në raport me vitin paradhës.
Llogaritë dalin nga Eurostat, që e rendit Shqipërinë ndër vendet e fundit në Europë për shumën që paguajmë për frymë. Sipas klasifikimit, e fundit është Turqia me 258 euro për frymë, ndjekur nga Maqedonia e Veriut me 265 euro mish për frymë, Bullgaria me 300 euro, Polonia me 329 euro, Hungaria me 339 euro Bosnja me 370 euro dhe Shqipëria me 385 euro.
Në krahun tjetër shpenzimet më të larta për mish në Europë janë Luksemburg ku shpenzohen 790 euro në vit për frymë. Më tej në renditje ne Islanda me 785 euro, Zvicra me 740 euro, Belgjika me 719 euro mish për frymë të shpenzuara në vit.
Mishi kushton më shtrenjtë në Luksemburg dhe në Zvicër, ku niveli i çmimeve është 2.5 herë më i lartë se në pjesën tjetër të Europës. Sipas klasifikimit, niveli i çmimeve është kryesisht më i lartë në vendet e Europës së Veriut si Islanda, Danimarka dhe Luksemburgu.
Në vendet e lindjes mishi është një produkt i lirë në krahasim me Europën Perëndimore.
Në Shqipëri vitet e fundit çmimi i mishit është rritur, duke reflektuar problemet me prodhimin vendas për shkak të rënies së numrit të krerëve. Në krahun tjetër kërkesa po vjen gjithnjë e në rritje nga flukset e larta turistike./O.S
