Mazhoranca tërhoqi nga rendi i ditës projektligjin për amnistinë penale pasi nuk mundi të siguronte 84 vota. Kush ishin shkaqet që Grupimi Basha dhe mazhoranca u prishën në momentet e fundit. Drafti ende pezull për “kleçkën” e orëve të fundit, për të përfituar falje të dënuarit për korrupsion.
Mazhoranca u tërhoq për momentin nga Amnistia Penale. Të burgosurit që prisnin këtë të enjte lirimin nga qelia si përfitues të Amnistisë Penale do të duhet të presin sërish për shkak se Parlamenti nuk arriti të gjente konsensusin për miratimin e aktit. Amnistia kërkonte shumicë të cilësuar prej 84 votash të cilët mazhoranca nuk i ka. Edhe pse ishin “dakordësuar parimisht” për miratimin e amnistisë, duket se në momentet e fundit një lojë e mazhorancës për të përfshirë në amnisti edhe personbat e dënuar për korrupsion, solli tërheqjen e deputetëve të grupimit Basha.
Bëhet fjalë për një amendament shtesë që në fillim u tha se u paraqit nga deputeti i PD-së Gledion Nallbati, por më pas kjo iu faturua grupit të PS-së. Qëllimi ishte që të përfitonin një vit ulje dënimi të gjithë personat e akusuar dhe dënuar për “ndikim të paligjshëm të zyrtarëve të lartë publik”, ose korrupsion.
Kjo lojë që ende nuk është qartësuar se kush e nxiti dhe e vijoi bëri që deputetët e Grupimit Basha të deklaronin mbrëmjen e së mërkurës që nuk do të merrnin pjesë në vitimin e djeshëm, duke mos dhënë votën për kalimin e amnistisë penale. Pas vendimit të Lulzim Bashës dhe Gazmend Bardhit për të mos e votuar, mazhoranca vetëm pak para se të niste seanca plenare u tërhoq nga amnistia që sipas Qeverisë ishte një amnistie mëshirë për atë kategori personash të cilët mund të merrnin edhe gjobë.
Grupi parlamentar i PS-së i kërkoi Lindita Nikollës të tërhiqte nismën nga rendi i ditës për arsyen e thjeshtë, në sallë nuk i kishte bashkë 84 vota, ndërsa homologët demokratë kishin nisur bllokimin e seancës. Me 74 vota pro, zero kundër e zero abstenim u hoq nga rendi i ditës votimi i amnistisë penale pasi nuk u arrit konsensusi.
Kryetarja e Kuvendit Lindita Nikolla vijoi me rutinën e miratimit të menjëhershëm të akteve duke kaluar në proces votimit. Me tërheqjen e amnistisë, kryeçështja e rendit të ditës ishte marrëveshja për emigrantët me Italinë, nismë e cila i shtoi tre vota çame grupit parlamentar të PS-së. Por pasi u tërhoqën nga ky ligj reagimet nga kundërshtarët ishin të menjëhershme. Kreu i grupit parlamentar të PD-së, Gazment Bardhi në një dalje për mediat deklaroi se maxhoranca tentoi që t’ia faturonte ligjin për amnistinë penale, opozitës.
Ai e cilësoi të turpshme faktin që u miratua marrëveshja me emigrantët. “E patë sot në rendin e ditës nuk ishte asgjë te mirë për qytetarët shqiptarë. Ka kohë që parlamenti është shndërruar në një organ që nuk miraton më ligje në shërbim të qytetarëve, por në dobi të një grushti njerëzisht. Për shkak se nuk arritën dot për pazare të tyre, e tërhoqën ligjin për amnistinë, që nga një ligj humanitar, ku do të përfitonin qytetarët e zakonshëm, e shndërruar për të amnistuar ministra, drejtorë, kryetare bashkie të korruptuar të kësaj qeverie. Mbetet e papranueshme.
Tentuan të mashtronin dhe opinionin publik, duke ia faturuar dhe opozitës. Secila parti është e mirëpritur në konfederatën e opozitës, ashtu si PDIU, që ka qenë gjithmonë aleate e PD.”, tha ai. Teksa u pyet për faktin se sa opozitar ishte në këtë rast Basha, që refuzoi të votonte për amnistinë fiskale, Bardhi ironizoi. “Ishte sot në Parlament? Se nuk e pashë. Zoti Rama pyet për orën, se unë nuk e besoj atë teorinë e gjumit. Por pyeta nëse ishte se nuk e kam ndjekur. Do të duhet të pyesni zotin Basha.”, tha ai
Ministri i Drejtësisë, Ulsi Manja ka sulmuar ashpër opozitën se po gënjen për amnistinë penale. Ai u shpreh se kjo amnisti do të votohet me 90 vota, pasi sipas tij në Kuvend ka deputetë të përgjegjshëm siç i quajti ai. “Kam dëgjuar disa avokatë që paradite rrinë në oborret e gjykatave për gjoba, në drekë shkojnë te partitë opozitare, në darkë në banaqet mediatike. E kemi bërë të qartë që nuk ka amnisti për korrupsionin dhe krimin e organizuar. Një nga ato gënjeshtar e kishit pak përpara këtu që tha se amnistia synon të amnistojë zyrtarët e korruptuar. Nuk u ve faj sepse këto ditë ata janë bërë bashkë gjasme, për të shpalosur programin.
Mos prisni gjë të vërtetë nga ato, është bërë bashkë me Nokën, dhe e vërteta ka ikur në drejtim të paditur”, tha Ulsi Manja. Ndërsa kreu i grupit parlamentar të Partisë Socialiste Bledi Çuçi, duke folur për Amnistinë Penale, ka treguar se një hap i tillë u mor në respekt të traditës për votimin me konsensus të plotë, ndërsa PS i ka votat e nevojshme. “Qendrimi i Bashës e kishim dëgjuar dje. Ne i kemi votat solide. Ka edhe të tjerë brenda parlamentit që e votojnë amnistinë. Do shohim çdo ndodhë në ditët në vijim. Sot e tërhoqëm në respekt të traditës për ta votuar me konsensus të plotë”, tha ai.
