Në përfundim të mbledhjes së qeverisë, ministrat kanë bërë me dije për mediat vendimet e marra.
Ministri i Mbrojtjes, Niko Peleshi bëri me dije se është miratuar projektligji për pagesat e prapambetura për ish-punonjësit e kombinatit të Poliçanit, që kapin vlerën e mbi 80 milion lekëve të reja.
Peleshi tha po ashtu se qeveria synon të zhvillojë industrinë ushtarake, pasi është një ndër vendet e pakta të Rajonit që e ka të fjetur këtë industri, duke i bërë thirrje investitorëve vendas dhe të huaj për të paraqitur oferta.
Peleshi: Kemi miratuar projektiligjin për pagesat e prapambetura për ish-punonjësit e kombinatit të Poliçanit.
Dua të shtoj disa fjalë për industrinë ushtarake, keni dëgjuar të flitet për fat të keq për kërkesën e madhe për municione dhe armatime.
Shqipëria është ndër vendet e pakta të Rajonit që nuk e ka të zhvilluar këtë industri. Ka nevojë për investime dhe sipërmarrës, dhe jemi të hapur dhe në pritje të ofertave dhe interesimeve nga aktorë të ndryshëm ndërkombëtar dhe vendase për ta riaktivuzar dhe për ta vënë në punë industri të reja ushtarake.
Ky projektligj u miratua sot, do të marrë rrugën e vet për të shkuar drejt parlamentit, ku duhet edhe të miratohet.
Janë mbi 80 milion lekë të reja që do të paguajë shteti për më shumë se 100 punonjës, pra paga dhe sigurime shoqërore./ S.M
