Chelsean shkatërroi West Ham në derbin e Londrës teksa të besuarit e trajnerit Mauricio Pochetino triumfuan me shifrat 5-0. Vendasit hapën llogaritë e takimit në minutën e 15 me anë të Cole Palmer që vërtetoi formën e jashtëzakonshme të këtij sezoni duke realizuar golin e 21-të personal.
Ndërkohë, në të 30-tën, “Blutë e Londrës” realizuan sërish me anë të Connor Gallagher që shënoi fluturimthi në hyrje të zonës pa i lënë shumë mundësi reagimi portierit Areola.
Vetëm gjashtë minuta më pas radhën për të festuar e pati Noni Madueke që nga fare pranë portës nuk e pati të vështirë për të realizuar me kokë. Në fraksionin e dytë, vendasit gjetën edhe golin e katërt me anë të Jackson që shfrytëzoi asistin e Maduekes. Sulmuesi Jackson shënoi në të 80-tën edhe golin e dytë personal, një gol që kërkoi edhe konfirmimin nga VAR.
Pas këtij suksesi, Chelsea ngjitet në kuotën e 54 pikëve në vend të shtatë ndërsa West Ham mbetet me 49 pikë në vend të nëntë.