INSTAT publikoi dje të dhënat e censit të mbajtur vitin e kaluar ku rezulton se në Shqipëri banorë rezidentë janë 2.4 milionë, rreth 430 mijë banorë më pak se viti 2011. Një tjetër e dhënë e rëndësishme del si nga besimet fetare ashtu edhe përkatësia etnike. Janë vetëdeklaruar me kombësi shqiptare 99.4% e qytetarëve, ndërsa grekë rreth 23 mijë banorë, vetëm 1% e popullsisë.
Pas gati nëntë muajsh pritjeje të pashpjegueshme. INSTAT (Instituti I Statistikave) ka bërë publkike dje të dhënat e censit të mbajtur në vitin 2023. Të dhënat e regjistrimit të përgjithshëm të popullsisë, të publikuara nga INSTAT ditën e djeshme tregojnë se popullsia rezidente në shtator 2023 ishte 2.4 milionë banorë. Në krahasim me vitin 2011, popullsia rezidente ka rënë me 400 mijë vetë ndërsa nëse marrim parasysh shtesën natyrore të këtyre viteve, rreth 490 mijë shqiptarë janë larguar përgjatë 12 viteve. Të dhënat e publikuara nga Instituti i Statistikave të premten, tregojnë se numëruesit e Censit të dymbëdhjetë në historinë e shtetit shqiptar, popullsia rezidente ishte 2,402,113 banorë. Dymbëdhjetyë vjet më parë, në censusin e vitit 2011, popullsia faktike ishte 2.8 milionë banorë ndërsa shtesa natyrore për periudhën 2012-2023, pra diferenca mes qytetarëve të lindur dhe atyre të vdekur, është 88 mijë vetë. Kjo do të thotë se në rast se Shqipëria nuk do të kishte emigrim, popullsia do të shtohej me 88 mijë vetë në vend që të tkurrej me 400 mijë. Numri i shqiptarëve që kanë përjetuar emigrimin ka gjasa që është më i lartë se sa kaq për shkak se në popullsinë rezidente 2023, përfshihen edhe shqiptarët që emigruan në dekadat e mëparshme dhe u rikthyen në vend në dekadën e fundit. E dhëna kryesore e censusit sugjeron se çdo vit përgjatë 12 viteve të fundit nga Shqipëria janë larguar së paku 40 mijë vetë ose gati 1.5% e popullsisë rezidente. Popullsia rezidente e Shqipërisë shënoi kulmin në vitin 1989 me 3.2 milionë banorë. Përgjatë periudhës 1989-2001, popullsia banuese ra në 3.1 milionë, por shtesa e munguar e popullsisë gjatë kësaj periudhe prej 550,000 vetësh sugjeron se në fakt, emigrimi i dekadës së parë pas komunizmit ishte afërsisht 650,000 vetë. Mes periudhës 2001-2011, popullsia rezidente ra nga 3.1 në 2.8 milionë, ndërsa shtesa natyrore e munguar ishte afërsisht 190 mijë vetë, duke sugjeruar një emigrim neto prej rreth 490 mijë vetëve. Të dhënat e censit 2023 sugjerojnë se emigrimi ka vijuar përgjatë dekadës së fundit me të njëjtin ritëm trullosës si edhe me dekadën paraardhëse, pavarësisht fakteve të shumta që sugjeronin për ngadalësim. Një tjetër e dhënë e rëndësishme është se mosha mesatare e popullsisë rezidente është aktualisht 42.5 vjeç, ose 7 vjet më e moshuar se sa një dekadë më parë.
Besimi fetar dhe minoritetet
Censi I fundit ka nxjerrë një shifër mjaft befasuese përsa I përket vetëdeklarimeve të popullsisë mbi etninë. 99.4% janë deklaruar me kombësi shqiptare, ndërsa 23 mijë 485 persona janë përgjigjur që janë grekë, egjiptianë 12.4 mijë, romë 9.8 mijë, bullgarë 7.1 mijë, boshnjakë 3 mijë dhe arumunë 2.5 mijë. Vlen të theksohet fakti që pakica e cila deri dje njihej si maqedonase janë tkurrur ndjeshëm. Banorët që jetojnë në zonën e Pustecit në shumicë janë deklaruar bullgarë, ndërsa vetëm 2281 janë vetëdeklaruar minoritet maqedonas. Ndërkohë, sa i përket besimit fetar, 4 përqind janë përgjigjur se janë ateistë. Po ashtu edhe treguesi tjetër mbi përkatësinë fetare konsiderohet , 1.1 milionë myslimanë, katolikë 202 mijë, ortodoksë 174 mijë, bektashinj 116 mijë. Bie në sy se numri i besimtarëve të deklaruar të krishterë të besimit katolik janë më shumë se ata ortodoksë. 244 331 banorë nuk kanë pranuar ta deklarojnë besimin fetar.
Tabela E Censit
Besimi Fetar
Mysliman – 1.101.718
Mysliman-Bektashi 115.644
Krishterë-katolikë 201.530
Krishterë–Ortodoks 173.645
Ungjillorë–9658
Tjetër besim–3670
I pacilësuar–332.155
Ateist–85.311
Nuk përgjigjen–244.331
Minoritetet
Grekë – 23 485 persona
Egjiptianë – 12 400 persona
Romë – 9 800 persona
Bullgarë – 7 100 persona
Boshnjakë –3 mijë persona
Maqedonas (Maqedonia e Veriut) – 2281 persona
Arumunë – 2 500 persona
Nuk janë përgjigjur – 134 451persona/kb
