Grupi Parlamentar i Partisë Demokratike i ka dërguar një kërkesë zyrtare Prokurorit të Përgjithshëm për verifikimin sipas ligjit të dekriminalizimit të Kryetarit të Bashkisë Malësi e Madhe Tonin Marinaj. Burime nga opozita shprehen se janë duke verifikuar të dhënat edhe për të paktën tre kryebashkiakë, që sipas tyre dyshohet se kanë fshehur të dhënat e përfshirjes në veprimtari kriminale.
Partia Demokratike kërkon hetimin e kryetarit të bashkisë së Malësisë së Madhe, Tonin Marinaj. Grupi Parlamentar i Partisë Demokratike kërkon verifikimin e thelluar nga Prokuroria e Përgjithshme për qytetarin e parë të Malësisë së Madhe. Në kërkesën, drejtuar prokurorisë, që mban firmën e 15 deputetëve, demokratët hedhin dyshime se Marinaj nuk mund të ushtrojë më detyrën për shkak se preket nga ligji i dekriminalizimit. Sipas tyre, Marinaj akuzohet nga Prokuroria e Antimafias Italiane si drejtues i një organizatë kriminale të trafikut ndërkombëtar të drogës, por këtë fakt nuk e ka deklaruar nga formularin e dekriminalizimit. “Në datën 5 Qershor 2015, Drejtoria Rajonale Antimafia, e Prokurorisë së Republikës, pranë Gjykatës së Firences, e përfaqësuar nga prokurori Dr. Giulio Monferini ka njoftuar mbylljen e hetimeve paraprake ndaj personave të hetuar, ku rezulton se shtetasi Tonin Marinaj, lindur në Shqipëri, më 05.12.1966, është në rolin e themeluesit, nxitësit dhe drejtuesit të një organizatë kriminale e përbërë prej më shumë se dhjetë anëtarësh, me tipare ndërshtetërore, me bazavepruese në Shqipëri dhe Itali, e angazhuar sistematikisht, profesionalisht dhe në vazhdimësi në eksportimin në territorin italian të sasive të mëdha të mariuanës për t’u shpërndarë me pakicë nga anëtarët e organizatës kriminale”, thuhet në kërkesën e grupit parlamentar të PD. Po ashtu janë duke u verifikuar të dhënat për tre kryebashkiakë të tjerë socialistë për të cilët ka të dhëna se mund të jenë dënuar ose proceduar në vendet e huaja për veprimtari kriminale por që i kanë fshehur këto të dhëna në formularin e vetdeklarimit. Për rastin Marinaj demokratët citojnë dhe pjesë nga dosja, ku emri i Marinajt sipas tyre rezulton në të paktën tre episode. “Episodi i parë: Kreu i organizatës kriminale Tonin Marinaj ka organizuar dhe drejtuar importimin në territorin italian dhe shpërndarjen tek anëtarët të 50 kilogramëve mariuanë në Firence, në datën 29.05.2010; Episodi i dytë: Kreu i organizatës Tonin Marinaj ka organizuar dhe drejtuar importimin në territorin italian dhe shpërndarje tek anëtarët për shitje të jo më pak se 75 kilogramëve mariuanë, në Firence, në datën 14.06.2010; Episodi i tretë: Kreu i organizatës Tonin Marinaj ka organizuar dhe drejtuar importimin në territorin italian dhe shpërndarjen tek anëtarët e 42 kilogramëve mariuanë, pjesë e një sasie prej 388 kilogramësh mariuanë të magazinuar në Firence, më datën 23.07.2010”, kërkesa e grupit parlamentar të PD. Grupi Parlamentar i Partisë Demokratike pohon se problemet me drejtësinë italiane nuk janë deklaruar nga Marinaj në formularin e dekriminalizimit. Opozitarët kërkojnë edhe referimin e gjetjeve përkatëse, për hetime të mëtejshme pranë Prokurorisë së Posaçme Kundër Krimit të Organizuar dhe Korrupsionit për veprën penale të fshehjes së të dhënave në formularin e vetëdeklarimit apo veprimtari të tjera kriminale.