Brenda tre ditëve Lulzim Basha duhet t’i dorëzojë Partisë Demokratike që drejtohet nga Sali Berisha gjithçka, duke nisur nga logo, vula, paratë edhe deri tek pasuordet e rrjeteve sociale. Në letrën e Flamur Nokës, drejtuar Lulzim Bashës, thuhet se: nëse ato përdoren do ta dërgojnë për ndjekje penale
Sali Berisha, pasi mori logon dhe vulën e Partisë Demokratike me vendim të gjykatës po i bën presion Lulzim Bashës që ti dorëzojë ato në një kohë rekord. Flamur Noka nëpërmjet një letre i ka kërkuar ish- kreut të PD Lulzim Basha që brenda tre ditëve të dorëzojë paratë dhe të mos përdorë simbolet e Partisë Demokratike. Ai i drejtohet Bashës si “deputet” dhe i kërkon që të mos përdorë asnjë simbol identifikimi të PD-së pas vendimit të Apelit. Madje Noka e ‘kërcënon’ duke thënë që përdorimi i simboleve dhe aseteve të Partisë Demokratike përbën kundravajtje ligjore dhe do të ndiqen penalisht. “Gjithashtu kërkojmë nga ana juaj që të mos përdorni simbolet identifikuese të PDSH të cilat me vendimmarrjet e Kuvendit të 11 dhjetorit 2021 të PDSH janë shfuqizuar si dhe në komunikimin publik të mos t’i drejtoheni publikut si Partia Demokratike e Shqipërisë për sa kohë nuk keni asnjë tager përfaqësimi. Ju bëjmë me dije që administrimi i çdo aseti të PDSH që nga data 11.06.2024 është nën një monitorim të vazhdueshëm nga ana jonë dhe për çdo veprim mbi to, i cili bie ndesh me interesat e PDSH nga ana jonë do të bëhet kallzim penal në organet kompetente, SPAK, Prokuroria e Rrethit Gjyqësor Tiranë, si dhe eventualisht do të kërkojmë dëmshpërblim në rrugë gjyqësore mbi pasuritë personale të personave përgjegjës, të cilët me veprime ose mosveprime cënojnë interesat e Partisë Demokratike të Shqipërisë”, thuhet në leter. Brenda 3 ditëve Lulzim Basha duhet të dorëzojë çdo aset të Partisë Demokratike, ku përfshihen ambientet e marra me qira, llogari bankare si edhe faqet zyrtare të PD në rrjetet sociale. “Këto asete përfshijnë por nuk kufizohen në, ambjente të marra me qera nga ana e PDSH, llogari bankare të PDSH, domain zyrtar i internetit të PDSH si dhe faqet zyrtare të PDSH në rrjetet sociale Facebook, Instagram, Tik Tok etj. Ftojmë të caktoni përfaqësuesit tuaj që brenda tre ditëve nga marrja e kësaj shkrese të kryeni veprimet përkatëse për dorëzimin ligjor të çdo aseti të PDSH i cili ndodhet në administrimin tuaj”, thuhet në letër. Më 11 qershor, Gykata e Apelit i dha vulën e Partisë Demokratike ish-kryeministrit Sali Berisha. Trupa gjykuese vendosi të mos pranojë ankimimin e Enkelejd Alibeajt duke lënë në fuqi vendimin e gjyqtarit Agron Zhukri.
Berisha thyen masën e arresit, pret ish kryeministrin turk në shtëpi
Kreu i Partisë Demokratike ka thyer sërish masën e arresit duke pranuar në shtëpi mysafirë, edhe pse i ndalohen këto takime, përveç familjarëve. Berisha ka pritur në banesën e tij gjatë ditës së martë ish-kryeministrin turk, Ahmet Davutoglu. Vetë Berisha nuk ka bërë asnjë postim mbi pritjen e ish-homologut turk në shtëpinë e tij, për shkak edhe të vendimit të gjykatës që i ndalon takimet me të tjerët, ndërsa imazhet janë shpërndarë nga stafi i Davutogluse. Mësohet se Davutoglu pati edhe një takim me ish-Presidenti Ilir Meta duke marrë pjesë në një aktivitet të organizuar nga Partia e Lirisë. Ahmet Davutoglu konsiderohet si arkitekti i idesë së Neo Otomanizmit të shprehur përmes librit të tij Thellësia Strategjike. Kjo strategji u aplikua na Ballkan për të paktën një dekadë e gjysmë në rajon sa Erdogan dhe Davutoglu bashkëqeverisnin duke nxitur madje edhe krijimin e partive me rrënjë islamiste në Kosovë dhe Maqedoninë e Veriut. Kjo është e disata herë që Berisha pret në shtëpi persona që nuk janë familjarë, duke kundërshtuar urdhrin e Gjykatës së Posaçme Antikorrupsion. Më parë Berisha u takua me gazetarin e Rait, ish-eurodeputetin gjerman të CDU-së, Elmar Brok, gjithashtu dhe me aktorin Çun Lajçi.
