Në vetëm tre muaj, bashkitë zgjeruan detyrimet e prapambetura për investime të kryera apo shërbime të marra me gati 600 milionë lekë.
Të dhënat nga Ministria e Financave tregojnë së nga më pak se 5.5 miliardë lekë në fund të dhjetorit të vitit të shkuar, borxhet e 61 njësive të pushtetit vendor në mars arritën në mbi 5.4 miliardë lekë. Po pse janë zgjeruar me 12 për qind detyrimet e prapambetura të bashkive dhe si mund të pakësohen ato?
“Kjo është tërësisht paradoksale. Është një barrë që vjen dhe mbartet me vete çdo vit. Çdo kryetar bashkie vjen me mendësinë: pse duhet të paguaj unë borxhet e tjetrit. Bazuar edhe te rezultatet e Censit bashkitë duhet të skanojnë më mirë nevojat e komunitetet ku ato qeverisin dhe të orientojnë shpenzimet në mënyrë racionale”, shprehet Merita Toska, eksperte e financave vendore.
Tirana ka nivelin më të lartë të detyrimeve të prapambetura me gati 23 për qind të totalit, por për shkak të financave që zotëron ky stok nuk është problem për bashkinë e kryeqytetit. Lista pasohet nga bashkitë e vogla e të varfra si Kavaja e Vora. Stok të konsiderueshëm borxhet kanë edhe Durrësi e Lezha.
“Në 10-vjeçarin e fundit burimet e të ardhurave të bashkive si nga vetja, por edhe nga Buxheti i Shtetit janë rritur, por kjo nuk është reflektuar në një kujdes më të shtuar në drejtim të shpenzimeve. Pagesa duhet të kryhet nga bashkitë dhe jo nga buxheti i shtetit. Ministria e Financave duhet të heqë dorë nga shlyerja e detyrimeve për bashkitë. Po kthehet në kulturë”, shprehet ekspertja.
Të dhënat nga “financat” tregojnë se pjesa më e stokut të borxhit që bashkitë kanë akumuluar deri në mars janë shkaktuar nga investimet e kryera por të pashlyera dhe shërbimet e marra por të papaguara. Gjithashtu vendimet gjyqësore, mallrat dhe kostot e mirëmbajtjes prodhuan edhe më shumë detyrime për njësitë e pushtetit vendor.
