Vitet e fundit, Korça ka ndryshuar totalisht sa u përket ndërtimeve të reja, investimeve brenda qytetit, për ta kthyer në një destinacion të preferuar për vizitorët.
Këtë vit, në Korçë duket se ka hasur një ngërç shitblerja e apartamenteve, situatë që nëse e krahasojmë me një vit më parë, momentalisht është e stopuar. Rritja e çmimeve të apartamenteve, të pronave të reja, bashkëngjitur edhe me faktorë të tjerë si largimi i popullsisë apo ndryshimet në ekonomi, kanë bërë që të ketë rënie të shitjeve.
Ardit Meta, ndërmjetës i pasurive të paluajtshme në Korçë, tregon për CNA TV, situatën aktuale duke nxjerrë në pah trendin në rritje të çmimeve të apartamenteve.
“Në momentin që po flasim është vënë re një stopim i shitjeve, në krahasim me të njëjtën periudhë të vitit të kaluar. Kjo ka ardhur për disa arsye, ndër më kryesoret përmendim shtrenjtimin e çmimeve të apartamenteve sidomos të pronave të reja, por edhe te pronat e vjetra kemi vënë re një trend rritës. Kjo, bashkëngjitur edhe me një sërë faktorësh të tjerë, si largimi i një pjese të popullsisë, por edhe normat ciklike të ekonomisë, kanë bërë që të kemi një stopim të shitjeve për momentin, jo në nivel alarmant, por trendi është vënë re drejt qëndrueshmërisë dhe rënies. Kanë ndikuar edhe lajmet e fundit për një rihapje të rivlerësimit të pronave që pritet tani në fund të shtatorit, besojmë se pas kësaj do të kemi një lëvizje të disa pronave që kanë ngelur pezull për arsye procedurash.”
Sa u përket çmimeve, Arditi thotë se kanë pësuar një rritje të ndjeshme, duke veçuar dy nga arsyet kryesore siç është rritja e çmimit të lëndëve të para si edhe rritja e fuqisë punëtore. Për nivelin e jetesës, kjo rritje prej 60-70% është tepër e konsiderueshme.
“Çmimet kanë pësuar një rritje të ndjeshme, gjë e cila u ndikua nga rritja e çmimeve të lëndëve të para, por edhe të fuqisë punëtore. Tani që po flasim, çmimet e lëndëve të para janë normalizuar. Këto çmime tani nuk janë reale, janë të bazuara dhe në rritjen e fuqisë punëtore dhe pagesës së tyre, por ekziston një fryrje e lehtë. Rritja është mbi 60-70%, për nivelin e jetesës është e konsiderueshme. Kjo është venë re edhe në çmimet e pronave të vjetra, të cilët duke parë rritjen e përgjithshme të çmimeve, tentojnë të përfitojnë nga situata, gjë që është në disfavor të kërkesës dhe të blerësve.
Ndërtimet e reja që i përkasin vitit 2023-2024, e nisin çmimin për metër katror nga 800€ deri në 1500€, por në këtë çmim ndikon tipologjia e apartamentit si edhe zona ku është ndërtuar në qytet ose në periferi.
“Nëse flasim për ndërtimet e reja të 2023-2024, një apartament 1+1 varion në 800€ për metër katror, ose me sipërfaqet që shiten sot diku në 60 mijë €. Për të njëjtën tipologji, për vilat që po ndërtohen shpesh në Korçë sidomos në lagjet karakteristike, ndërtim me tri kate, në këto zona shkon afër 1200-1500€ për metër katror, me apartamentet 1+1 deri në 75 mijë €.”
Krahas rritjes së çmimit të apartamenteve në shitje, edhe çmimet e qirave në Korçë janë rritur ndjeshëm. Për pronat e vjetra qiraja nis në kuotën e 200€, ndërsa për të rejat nis në 300€. Këshilla e Arditit për këtë situatë, duke marrë parasysh çmimet, për familjet që kanë menduar të marrin një shtëpi me qira do të ishte më mirë të aplikonin për kredi dhe shtëpia të bëhej pronë e tyre.
“Edhe kjo është e vërtetë, ka pasur rritje të konsiderueshme, jo të gjithë e kanë luksin ose mundësinë për të pasur një shtëpi të re, e normalisht zgjedhin të marrin shtëpi me qira. Kërkesat për qira janë rritur e normalisht rritet edhe çmimi, të cilat kanë kaluar nga 300-350€ në muaj. Te çmimi ndikon mobilimi, por edhe vjetërsia e pronës. Edhe te pronat e vjetra është vënë re rritje, që varion nga 200-250€ në muaj. Momentalisht me këto çmime do ishte më e këshillueshme nga ana ime për familjet që kanë menduar të marrin një apartament me qira, është më e mira të marrin një kredi dhe ta bëjnë të tyren pronën dhe të mos paguajnë për diçka që nesër nuk ka asnjë kthim.”
Duket se trendi i rritjes së çmimeve të qirave dhe të apartamenteve në shitje, nuk ndodh vetëm në qytetin e Korçës, por edhe në qytete të tjera të Shqipërisë, ku po ndërtohen një sërë vilash apo pallatesh të reja. Pas përfundimit të rivlerësimit të pronave që pritet të ndodhë brenda shtatorit, edhe situata e stopuar me shitblerjen e apartamenteve mund të ndryshojë për pronat që kanë ngelur pezull për shkak të procedurave./ S,M
