Presidentja e Komisionit Europian, Ursula von der Leyen kritikoi kryeministrin hungarez Victor Orban pasi foli në Parlamentin Evropian për përkrahje të Vladimir Putin, lejimin e ndërhyrjes së huaj në Europa nga Rusia dhe Kina. Në veçanti, Ursula von der Leyen, ishte kundër idesë së Orban për dështimin e Ukrainës në luftën përballë Rusisë.
“Ka ende disa që fajësojnë për këtë luftë jo pushtuesin por të pushtuarin. Jo për epshin e Putinit për pushtet, por për etjen e Ukrainës për liri. Dua t’i pyes ata. A do të fajësonin ndonjëherë hungarezët për pushtimin sovjetik të vitit 1956? Apo çekët dhe sllovakët për represionin sovjetik të vitit 1968? Apo lituanezët për goditjen sovjetike të vitit 1991?”, tha Ursula von der Leyen.
Pas komenteve nga drejtuesit e grupeve politike të Parlamentit Europian, Orbanit të tronditur iu dha mundësia të përgjigjej dhe tha se “ishte i befasuar nga ajo që tha presidentja”. Orban shtoi se Komisioni është bërë “një armë politike” në vend që të jetë neutral dhe të fokusohet në mbrojtjen e traktateve të BE-së.
“Qëllimisht nuk i ngrita dallimet tona, sepse si presidencë e Këshillit po punojmë në emër të Evropës. Nuk është e drejtë të flasim për këto dallime mendimesh kur flasim për presidencën”, tha Orban.
Von der Leyen e përfundoi sulmin e saj ndaj Orbanit duke trajtuar migracionin, një temë e nxehtë politike dhe një pikë e gjatë e bisedës së kryeministrit hungarez, i cili argumentoi një ditë më parë në një konferencë shtypi se vendi i tij ishte një nga të vetmit që luftonte për të mbajtur emigrantë pa dokumente jashtë Bashkimit Evropian.
Por Von der Leyen i zbuti goditjet e saj duke e mbyllur fjalimin e saj me një thirrje drejtuar popullit hungarez.
“Ne jemi një familje. Historia juaj është historia jonë. E ardhmja juaj është e ardhmja jonë. Dhjetë milionë hungarezë janë 10 milionë arsye të mira për të vazhduar të formojmë të ardhmen tonë së bashku”, u shpreh Von der Leyen./e.t
