Bashkimi Europian ka aprovuar një fond prej 6 miliardë eurosh për Ballkanin Perëndimor, në kuadër të Planit të Rritjes Ekonomike. Mes vendeve që përfitojnë është edhe Shqipëria, duke plotësuar kushtet.
Më 16 tetor pritet të bëhet edhe ndarja e këtij fondi, ku sipas përllogaritjeve të përafërta Shqipëria pritet të përfitojë në total 922 milionë Euro, ndërsa si mjete “parafinancuese” 64.5 milionë. Më shumë fonde në rajon do të përfitojnë Bosnje-Hercegovina dhe Serbia.
Por, para se të bëhen këto pagesa, vendet përfituese duhet t’i nënshkruajnë marrëveshjet dhe t’i ratifikojnë ato në parlamentet e tyre kombëtare, sepse dy miliardë euro do të jenë para pa kthim, ndërsa të tjerat do të jenë kredi të favorshme, të cilat duhet të kthehen. Me këtë paketë, Bashkimi Europian synon të ndihmojë rritjen ekonomike në vendet e rajonit dhe, në këtë mënyrë, ta përshpejtojë procesin e integrimit të tyre europian.
Por janë disa detyra shtëpie që qeveria dhe biznesi duhet të realizojnë, si formalizimi i ekonomisë; lufta kundër korrupsionit; harmonizimi i kuadrit ligjor; zbatueshmëria e ligjit dhe riorganizimi i biznesit.
Por çelja e negociatave dhe rrugëtimi i Shqipërisë në realizimin e reformave do të ndihmohet me fonde nga Bashkimi Europian.
Sektorët që pritet të përfitojnë më shumë financime, për t’u rritur zhvilluar janë bujqësia, turizmi dhe tregtia.
Por si paraqiten marrëdhëniet ekonomike të Shqipërisë me Bashkimin Europian?
Vendi ynë realizon pjesën më të madhe të tregtisë dhe vendet europiane, pjesë e unionit, më saktësisht 57.8% të totalit të shkëmbimeve tregtare. 71% e eksporteve tona janë drejt tregjeve europiane, ndërsa ne importojmë nga Bashkimi Europian 51.4% të mallrave dhe produkteve që konsumojmë në vend./ S.M
