Një përqafim me njerëzit tuaj të dashur mund t’iu sjellë telashe në një aeroport të Zelandës së Re nëse zgjat për shumë kohë.
Aeroporti ndërkombëtar në Dunedin ka vendosur një kufi prej tre minutash për përqafimet, si pjesë e një përpjekjeje për të përmirësuar sigurinë dhe trafikun në ambjentet e brendshme të aeroportit.
“Koha maksimale e përqafimit është 3 minuta. Për t’i thënë njëri tjetrit mirupafshim apo lamtumirë në një interval më të gjatë kohe mund të qëndronin në parkingun e makinave” shkruhet në tabelen e vënë në aeroport.
Shefi ekzekutiv i aeroportit, Dan De Bono tha se nuk do të ketë një “njësi policie” që zbaton rregullin, por do të jetë stafi që do t’ju kërkojë me mirësjellje pasagjerëve të lëvizin në parkingun e makinave.
“Ne nuk jemi këtu për t’u thënë njerëzve se sa kohë duhet të përqafohen, por është më shumë mesazhi i ju lutemi të ecni përpara dhe të siguroni hapësirë për të tjerët.”, tha ai për Associated Press.
Rregulli i vënë në aeroportin e Dunedin, në Zelandën e Re vjen pasi në qytetin me 135 mijë banorë, Aeroporti ka një hapsirë të vogël dhe shpesh here njerëzit që i japin lamtumirë njëri tjetrit shkaktojë kaos dhe parregullësi për pasagjerët e tjerë që nxitojnë të arrijnë fluturimet e tyre dhe për ata që kthehen në shtëpi./K.B