Bill Gates kohët e fundit dhuroi 50 milionë dollarë për një organizatë jofitimprurëse që mbështet kandidaturën presidenciale të Kamala Harris, raportoi New York Times. Dhurimi iu bë Future Foruard, i cili është grupi kryesor për mbledhjen e fondeve nga jashtë që mbështet zëvendëspresidenten në garë.
Gates, megjithatë, nuk e ka mbështetur publikisht Harris. Raporti theksonte gjithashtu se bashkëthemeluesi i Microsoft, në telefonatat private me miqtë dhe njerëzit e tjerë këtë vit, shprehu “shqetësimin” e tij për Donald Trump, nëse do bëhej sërish president.
Fondacioni Bill & Melinda Gates, që është organizata filantropike e Gates, është i shqetësuar për zgjedhjen e mundshme të Trump në lidhje me shkurtimet e mundshme të planifikimit familjar dhe programeve globale të shëndetit, shtoi raporti.
Megjithatë, Gates ka thënë se ai mund të punojë me secilin nga kandidatët.
“Këto zgjedhje janë ndryshe”.
Gates theksoi dypartishmërinë e tij në një deklaratë në përgjigje të raportit dhe shtoi se “këto zgjedhje janë të ndryshme”. “Unë mbështes kandidatët që demonstrojnë një përkushtim të qartë për përmirësimin e kujdesit shëndetësor, reduktimin e varfërisë dhe luftimin e ndryshimeve klimatike në SHBA dhe në mbarë botën,” tha ai për gazetën.
“Unë kam një histori të gjatë të punës me liderë në të gjithë spektrin politik, por këto zgjedhje janë të ndryshme, me një rëndësi të paparë për amerikanët dhe njerëzit më të cenueshëm në mbarë botën,” shtoi ai.
Pasi Joe Biden u largua nga gara dhe la si kandidate Harris, Gates në një intervistë me FRANCE 24 kishte mirëpritur perspektivën e “dikujt që është më i ri, që mund të mendojë për gjëra të tilla si AI”.
Melinda French Gates, ish-gruaja e Gates, e kishte mbështetur publikisht Harrisin në të kaluarën, duke përmendur nevojën për një udhëheqës “i cili do të ngrihet për lirinë riprodhuese”. “Unë po mbështes Zëvendës Presidenten Kamala Harris sepse ajo është udhëheqëse. Ajo ka një vizion frymëzues për Amerikën – dhe ka përvojën për ta bërë atë realitet.
Çështjet që ajo ka prioritet janë ato që kanë rëndësi për votuesit. Ajo ka qenë duke përshkuar vendin për të ngritur çështjen për të drejtat riprodhuese ndërsa gjykatat dhe legjislaturat shtetërore po përpiqen t’i heqin ato. Ajo udhëhoqi legjislacionin për të eliminuar pabarazitë racore në kujdesin shëndetësor të nënave. Ajo po udhëheq politika për t’i bërë pushimet me pagesë, kujdesin për fëmijët dhe kujdesin për të moshuarit, që janë më të përballueshme për familjet,” shkroi ajo në X në korrik./K.B
