Reforma në drejtësi
Rama: Amerikanët sollën Noc Rrokun, reformën e bëri PS me mua në krye
Në emisionin “Opinion” me gazetarin Blendi Fevziu, Kryeministri Edi Rama shpjegon qëndrimin e tij në lidhje me reformat në drejtësi dhe përfshirjen e Partisë Socialiste në këtë proces. Përballë pyetjeve rreth ndikimit të mundshëm të qeverisë mbi organet e drejtësisë dhe akuzave për përfshirje në korrupsion të disa ish-zyrtarëve të PS-së, Rama deklaron se nën udhëheqjen e tij, Partia Socialiste ka ndërmarrë hapa historikë për të ndarë drejtësinë nga ndikimi politik. Në një bisedë mbi sfidat dhe arritjet në drejtësi, Kryeministri Rama thekson vendosmërinë e tij për të lënë një drejtësi të pavarur, që i jep fund çdo ndikimi politik mbi proceset hetimore dhe gjyqësore. Duke u ndalur te rasti i ish-deputetit Jurgis Çyrbja dhe akuzat ndaj tij për bashkëpunim me grupe kriminale, Rama shprehet se ndihet i lehtësuar kur persona që shpërdorojnë besimin publik ndëshkohen nga drejtësia. Ai nënvizon se për të, as pasuria dhe as pushteti nuk kanë vlerë përballë integritetit dhe dëshirës për të lënë një emër të pastër, duke përmendur se reforma në drejtësi është një nga arritjet më të mëdha të Partisë Socialiste dhe vullnetit të tij politik.
Blendi Fevziu:Zoti Rama, pyetja ime është e drejtpërdrejtë. A ndikoni ju SPAK-un?
Edi Rama: Për këtë po të jap përgjigje, Blendi. Të thuash që unë ndikoj SPAK-un ose i bëj presion është ofendim për inteligjencën e këtij populli. Partia Socialiste, nën udhëheqjen time, ka bërë një hap epokal në historinë e këtij vendi duke tërhequr plotësisht dorën e saj nga drejtësia. Nuk ka asnjë ndërhyrje apo presion nga ana jonë, as për të favorizuar dikë, as për të dënuar dikë tjetër. Ky është një vendim që ka kosto, sepse drejtësia, e liruar nga pushteti politik, godet edhe në radhët tona. Dhe kjo kosto është e mirëseardhur për mua.
Blendi Fevziu: A po sugjeroni që PS ka hequr dorë totalisht nga ndikimi në drejtësi? Kjo është diçka që do të çonte drejtësinë drejtë përpara.
Edi Rama: Pikërisht, dhe kjo është arsyeja pse e kemi bërë. Për herë të parë në historinë e Shqipërisë, PS ka shprehur vullnetin më të plotë për të ndarë drejtësinë nga pushteti politik. Ne kemi kuptuar që gjykimi për vepra penale nuk mund të bëhet nga pushteti politik. Për këtë është drejtësia, prokuroria, dhe gjykata, dhe ne kemi krijuar kushtet që kjo të ndodhë pa asnjë ndikim nga ne.
Blendi Fevziu: Ndërkohë, ish-deputeti i PS-së, Jurgis Çyrbja, është arrestuar për bashkëpunim me grupe kriminale. Cili është qëndrimi juaj për këtë çështje?
Edi Rama: Këto janë broçkulla dhe spekulime, Blendi. Në Shqipëri, nuk është e pazakontë që dikush të fillojë të përhapë një lajm pa asnjë bazë të fortë. Ai është sot në duart e drejtësisë për një çështje që vetë organi që ka vepruar ndaj tij e ka sqaruar. Më lehtësohet shpirti kur dikush që ka marrë besimin e PS-së, dikush që ka marrë mandatin nga unë, nëse del nga rruga e drejtësisë, ndëshkohet. Përzgjedhja e njerëzve bëhet në bazë të asaj që dimë, por në rrugën e jetës njerëzit mund të devijojnë dhe të bien në korrupsion. Sistemi është aty për t’i ndëshkuar.
Blendi Fevziu: Një akuzë tjetër që ka marrë vëmendje është ajo e deputetes Monika Kryemadhi, e cila ka deklaruar se “peshku i madh në telefonin e saj është Edi Rama.” Çfarë keni për të thënë për këtë akuzë?
Edi Rama: Unë jam peshku më i madh nga të gjithë, dhe këtë e them me humor, pasi jam dy metra i gjatë. Por, në thelb, problemi nuk është sa i madh është peshku apo kush është peshku. Problemi është se sa nga këta njerëz kanë futur duart në pasuritë e përbashkëta apo kanë përfituar në mënyrë të paligjshme. Për veten time, nuk kam asnjë përfitim të paligjshëm dhe as nuk kam ndërmend të kem. Që i vogël kam qenë i vetëdijshëm që jeta ka një fund dhe, në momentin kur kalon në anën tjetër, as pasuritë, as kreditë, as pronat nuk të shërbejnë më. Ajo që mbetet është emri yt. Dhe unë luftoj çdo ditë për emrin tim, jo për pasuri apo pushtet.
Blendi Fevziu: Ju keni deklaruar se reforma në drejtësi është një arritje e Partisë Socialiste. A keni pasur përkrahje nga ndërkombëtarët për këtë reformë?
Edi Rama: Amerikanët kanë mbështetur fort procesin, por reforma në drejtësi është një produkt i Partisë Socialiste me mua në krye. Amerikanët dhe evropianët kanë pasur dyshime fillestare, sepse ndoshta nuk e prisnin që dikush në këtë vend të kishte vullnetin e plotë për ta ndarë drejtësinë nga politika. Por, në fund, ne ia dolëm. Dhe kjo është hera e parë në historinë e Shqipërisë që po shohim ministra, deputetë dhe kryetarë bashkish të merren të pandehur. Ky ka qenë një qëllim që e kam ëndërruar gjithmonë, që drejtësia të godasë majtas dhe djathtas, pa bërë asnjë përjashtim.
Blendi Fevziu: Po për akuzat e tjera që ka bërë Kryemadhi ndaj jush?
Edi Rama: Zonja është në hallin e vet, dhe unë nuk debatoj me njerëz që janë në halle të mëdha. E kam thënë dhe më parë: nuk ka bir nëne apo bir tjetër që mund të më thotë se një qindarkë e imja si taksapagues është në xhepin e tij. Kjo është një histori qensh që lehin nga të katërta anët, duke krijuar një atmosferë të ndotur. Por unë nuk e lejoj që këto fjalë të ndikojnë mbi detyrën time dhe mbi emrin që dua të lë pas.
Blendi Fevziu: Nëse SPAK do ju thërrasë, do shkoni zoti Rama?
Edi Rama: Mua?
Blendi Fevziu: Po!
Edi Rama: Po pse mos të shkoj. Patjetër. E vajtura në SPAK nuk është fajësim.
Blendi Fevziu: A e dini që ata kanë hapur një hetim për McGonigal?
Edi Rama: Ata të hapin çdo hetim që shohin të arsyeshme nuk kam asnjë problem unë. Dhe kjo çështje e McGonigal sidomos mua më bën shumë për të qeshur. Më krijon një të papërmbajtur gaz kur thoshte Konica.
Blendi Fevziu: Pse?
Edi Rama: E kemi shpjeguar këtë tani. Me këtë do merremi tani? Shqipëria ka hapur negociatat për anëtarësim. U premtove njerëzve që do flasim për ekonominë dhe pensionet. Tani shkojmë te McGonigal merremi me telefonin e një hallexhie, dalim ke këta hallexhinjtë e tjerë. Këta janë njerëz në hall.
Blendi Fevziu: Zoti Rama, çfarë komenti keni për akuzat ndaj Ilir Metës dhe përfshirjen e tij si subjekt i drejtësisë?
Edi Rama: Nuk kam asnjë koment për këtë çështje, Blendi. Meta është një subjekt i drejtësisë dhe drejtësia duhet të veprojë sipas rregullave të veta. Policia e Shtetit, gjithashtu, nuk varet nga unë. Ata kanë drejtuesit e tyre, protokollet dhe procedurat për çdo operacion. Nuk kam asnjë rol në këtë proces dhe nuk bëj komente për çështje që i përkasin drejtësisë. Ju mund ta trajtoni këtë në studio si të dëshironi, por për mua është një çështje që duhet të zgjidhet nga drejtësia.
Blendi Fevziu: Ka pasur gjithashtu kritika që krahasonin Shqipërinë me Kolumbinë dhe e cilësonin si një narkoregjim. Si i përgjigjeni këtyre kritikave?
Edi Rama: Është shumë e lehtë të bësh krahasime të tilla, por nuk kanë asnjë bazë reale. Shqipëria ka hapur negociatat për anëtarësim në Bashkimin Evropian. Nuk do të ishte e mundur që një vend që konsiderohet si “narkoregjim” apo regjim i ngjashëm të arrinte këtë stad. BE-ja është shumë e kujdesshme në këtë proces dhe çdo hap i Shqipërisë është nën një vëzhgim të rreptë nga ekspertë të BE-së, që punojnë me fakte dhe analizojnë situatën reale. Ata nuk bazohen në perceptime apo opinione, por në skanim të plotë dhe profesional të gjendjes në vend.
Blendi Fevziu: Pra, sipas jush, këto krahasime janë të pavërteta?
Edi Rama: Janë absolutisht të pavërteta dhe nuk përkojnë me realitetin e progresit që ka bërë Shqipëria. BE-ja nuk hap negociatat për anëtarësim me vende që janë në një situatë të tillë siç pretendohet. Shqiptarët duhet të kuptojnë që ka një proces rigoroz dhe serioz të vlerësimit nga BE-ja. Këto etiketime nuk janë asgjë më shumë se sulme të pabaza që nuk reflektojnë realitetin e përparimit tonë.
Blendi Fevziu: Zoti Rama, gjatë inaugurimit të Xhamisë së Namazgjasë, përmendët se për të qenë në formë atë ditë keni përdorur disa ilaçe. Mund të na shpjegoni më shumë për këtë?
Edi Rama: Po, ishte një situatë jo e lehtë për mua. Për të qenë i pranishëm dhe në formë për atë ngjarje të rëndësishme, u detyrova të përdor disa ilaçe të forta, të cilat më shkaktuan pagjumësi. Në fakt, kjo ishte pjesa më e vështirë, pasi të qëndroje pa gjumë kishte ndikim të madh.
Blendi Fevziu: Përmendët gjithashtu se keni bërë një operacion. Si ishte eksperienca juaj në spitalin publik?
Edi Rama: Nuk kishte asnjë problem me operacionin vetë; për mua ishte një eksperiencë mjaft pozitive. Ishte hera e dytë që bëj operacion në spitalin publik dhe pashë nga afër mënyrën si funksionon. Edhe kur dilja natën në korridore, ambienti dhe shërbimet nuk kishin asnjë dallim nga spitalet jashtë vendit. Ishte një përvojë që më tregoi se spitalet tona publike funksionojnë mirë.
Blendi Fevziu: Përmendët se keni dalë nga spitali më herët sesa rekomandohej. Pse kjo nxituat kaq shumë?
Edi Rama: E vërtetë, mjekët më kishin rekomanduar të qëndroja tre ditë në regjim shtrati, por dola të nesërmen. Arsyeja ishte vizita e një miku nga Ankaraja dhe inaugurimi i xhamisë, ku duhej të isha i pranishëm. Më duhej të qëndroja në këmbë dhe për këtë përdora ilaçe të forta, por ato ilaçe më lanë pa gjumë.
Blendi Fevziu: Si e keni kaluar kohën gjatë netëve pa gjumë?
Edi Rama: Për të kaluar kohën, fillova të shoh fragmente nga programet televizive. Në fakt, zakonisht nuk i ndjek këto programe, por atëherë për herë të parë hyra në YouTube dhe pashë disa fragmente që nxirrni ju dhe të tjerët. Mbeta i befasuar nga përmbajtja dhe nga ajo që i serviret publikut çdo natë.
Blendi Fevziu: Zoti Rama, shpesh herë shtëpia juaj është përmendur si “sarajet e Surrelit”. A keni një përgjigje për këtë përshkrim?
Edi Rama: Po, kam një përgjigje të qartë. Unë jetoj në një shtëpi të ndërtuar si qindra e mijëra shtëpi që shqiptarët kanë ndërtuar me dy, tre, apo pesë kate. Ndërkohë, shtëpia ime është ndërtuar sipas dëshirës dhe vizionit tim për arkitekturën dhe mënyrën se si e shoh unë botën. Është një shtëpi unike, e çuditshme për disa ndoshta. Për më tepër, mbi shtëpinë time ndodhet një banesë tjetër, një super shtëpi me tre kate, që i përket një familjeje punëtore nga veriu, të cilët e kanë ndërtuar aty prej vitesh.
Blendi Fevziu: Atëherë, përse mendoni se përdoret termi “saraje”?
Edi Rama: Termi “saraje” përdoret nga disa si formë sulmi dhe propagande. Në fakt, shtëpia ime nuk është e ndonjë madhësie ekstreme. Kur flitet për metrat katrorë, nuk flasim për hapësirën e banimit në vetvete, por për dizajnin dhe strukturën e murit rrethues. Për mua është arkitekturë dhe për këtë kemi ndarje të madhe të opinioneve. Unë besoj në arkitekturën që ka shndërruar Tiranën në një destinacion turistik. Ndërsa ata që e quajnë “saraje”, kanë një vizion të ndryshëm për estetikën, që për mendimin tim, i përket një mentaliteti tjetër, një “Bathore” që e shohin si mrekullinë e shtatë të botës.
Blendi Fevziu: Si ishte puna e asaj biletës së basketbollit? Zoti Meta për 15 mijë Euro operacione në Vjenë është atje ku është. Ju uleni atje tek ai stoli i basketbollit. Sa kushtonte bileta?
Edi Rama: Faleminderit që ma bëre këtë pyetje.
Blendi Fevziu: Sa kushtonte?
Edi Rama: Ajo biletë as nuk blihet e as nuk shitet. Ato janë vende të rezervuara nga personat që i kanë marrë për vite të tëra.
Blendi Fevziu: Që në rastin konkret kush ishte?
Edi Rama: Po ç’rëndësi ka kush ishte? Miq të mi… Dhe që donin të më jepnin këtë kënaqësi. Në Amerikë kjo gjë është njësoj sikur të fton dikush në restorant.
Blendi Fevziu: Miq që kanë interesa në Shqipëri, apo miq që s’kanë lidhje me Shqipërinë?
Edi Rama: Jo fare. Do me korruptonte mua me biletën? Këto janë muhabete kot o Fevzi tani. Unë as kam marrë biletë, as kam parë biletë, as kam vënë njeri të blejë biletë, as ka blerë njeri biletë. Në SHBA vendet e rezervuara janë në të gjitha llojet e sporteve. Rezervohen nga njerëzit jo thjesht për vete që të shkojnë çdo herë, por edhe për të ftuar miq siç ftohen në restorant, siç ftohen në kafe. Meqë hape çështjen e dhuratave unë po të them. Unë jam i pari kryeministër në historinë e këtij vendi. Tani nuk po fus kohën e komunizmit se atëherë nuk kishte të tilla që çdo dhuratë me dhuratat që më vijnë se vjen një delegacion dhe lënë dhurata. Dhuratat në raste të caktuara kanë vlerë shumë të madhe. Unë me dhuratat e marra kam krijuar një muze në kryeministri dhe çdo dhuratë që vjen për mua regjistrohet si pronë e Republikës së Shqipërisë. Dhe vetëm në ora në vlerë që janë të regjistruara si pronë e Republikës së Shqipërisë bëhet fjalë për shuma shumë të mëdha. Pra që të jemi shumë të qartë.
Blendi Fevziu: Pyetja ime është kush është personi që ju ka ftuar?
Edi Rama: Është një mik pa asnjë lidhje me Shqipërinë dhe nuk kam arsye ta deklaroj sepse nuk është dhuratë. Është një ftesë. Është njësoj, atëherë duhet të deklarojmë me kë ishim në restorant, me kë ishim në kafe. Nuk i kemi këto detyrime. Po të shpjegoj pyetja ime është. Ore këta kryeministrat e tjerë, kanë marrë dhurata këta? Se unë kur kam vajtur në kryeministri kam gjetur “terra vuota”, asnjë gjë. Pyetja ime është a kanë marrë a s’kanë marrë dhurata.
