Ish-ministri Damian Gjiknuri, aktualisht deputet dhe Sekretar për Çështjet Zgjedhore, ishte i ftuar këtë të diel në një emision televiziv. Në fillim ai zbërtheu detaje nga vota e diasporës, e cila do të ketë mundësi në zgjedhjet e 2025 të votojë për herë të parë.
“E vetmja gjë e papërfunduar deri tani për zgjedhjet e ardhshme është vota e diasporës, ku KQZ ka ende një vendim për të marrë që përcakton proceduarat e numërimit të fletëve të votimit që vijnë në jashtë dhe me këtë kompletohet e gjithë baza ligjore. Këtu bëhet fjalë për ngritjen e platformës për aplikimin e qytetarëve nga jashtë për t’u regjistruar dhe pastaj e gjithë baza tjetër pasi vota nga jashtë është një sfidë e vërtetë logjistike”.
Më tej, Gjiknuri hodhi poshtë të gjitha pretendimet për manipulime, duke theksuar se kjo është e pamundur sipas tij.
“Është absurditet të mendosh që do të manipulohet vota e diasporës kur qytetarët që votojnë nga jashtë shteti nuk ka asnjë influencë. Këto janë qarje para disfatës. Nuk ka asnjë mundësi për manipulim të këtyre votave pasi ato janë në zarfe të mbyllura anonime”, tha Gjiknuri./K.B
